Navigation

Inhaltsbereich

  • Erste Mitteilung
  • Neuen Beitrag einfügen

La Regenza ha tramess en consultaziun il sboz tar la revisiun totala da la Lescha davart il traffic public en il chantun Grischun. Ils puncts centrals dal project da revisiun èn l'avertura dal territori chantunal cun ina purschida commensurada dal traffic public da persunas e la finanziaziun da questa purschida.

Las pitgas principalas dal traffic public entaifer il chantun furman il traject da las Viafiers federalas svizras (VFF) cun binaris da ladezza normala tranter Cuira e Maiavilla sco er la rait da la Viafier retica (VR) e da la Viafier Matterhorn-Gottard (VMG) cun binaris metrics d'ina lunghezza da var 400 kilometers. Questas purschidas vegnan cumplettadas cun differentas lingias da bus. Questa rait dal traffic public collia centers, aglomeraziuns, territoris rurals sco er lieus turistics e renda pia accessibel l'entir territori chantunal. Ella serva a transportar pendularias e pendularis en il traffic quotidian, ha dentant er ina rolla impurtanta en il traffic turistic ed en il traffic da temp liber.

Empustaziun e finanziaziun da la purschida dal traffic public en il chantun
La Lescha davart il traffic public en il chantun Grischun (LTP) è vegnida relaschada l'onn 1994. En il rom da refurmas da la viafier sin plaun federal èn vegnidas fatgas dapi lura pliras revisiuns da leschas che tangheschan l'empustaziun e la finanziaziun dal traffic public. Tranter auter è vegnida relaschada l'Ordinaziun davart l'indemnisaziun dal transport regiunal da persunas (OITRP) che fixescha en spezial l'indemnisaziun dals custs betg cuvrids sco er l'empustaziun dal traffic regiunal da persunas. Plinavant è vegnì stgaffì il fond per l'infrastructura da viafier (FIV) per finanziar l'infrastructura da viafier. Tut las midadas han consequenzas per l'empustaziun e per la finanziaziun dal traffic public en il chantun Grischun. Supplementarmain èn er sa midadas las pretensiuns da la populaziun e da l'economia envers il traffic public. Correspundentamain sto l'avertura dal territori chantunal cun il traffic public vegnir sviluppada vinavant confurm als basegns ed adattada per il futur.

Promover sistems da tracziun che schanegian il clima
Ultra da quai duai la revisiun totala da la Lescha davart il traffic public en il chantun Grischun stgaffir las basas per pudair promover mesiras per reducir l'emissiun da CO2 en il traffic public. Concretamain duai ina basa giuridica permetter da nov al chantun da pajar contribuziuns per cumprar e per duvrar vehichels electrics u vehichels che funcziunan sin basa d'idrogen en il traffic public.

La consultaziun dura fin ils 27 da settember 2021. Ils documents pon vegnir consultads sin la pagina d'internet dal chantun Grischun.


Infurmaziuns:
- president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel per telefon tranter las 10.00 e las 17.00) , e‑mail Mario.Cavigelli@diem.gr.ch
- Thomas Schmid, manader da l'Uffizi d'energia e da traffic, tel. +41 81 257 36 21, e‑mail Thomas.Schmid@aev.gr.ch


Gremi: Regenza
Funtauna: rg Departament d'infrastructura, energia e mobilitad

 

Neuer Artikel