Navigation

Inhaltsbereich

  • Erste Mitteilung
  • Neuen Beitrag einfügen

Las scolas grischunas cumenzan il nov onn da scola danovamain cun tests. Fin la primavaira 2022 vegnan ils tests en las scolas cuntinuads en il chantun cun ina procedura d'annunzia simplifitgada. Ils sets da test adempleschan las autas pretensiuns da l'autoritad da medicaments Swissmedic ed èn admess per tests repetitivs en las scolas.

Ils tests en las scolas èn acceptads fitg bain en il Grischun. Bunamain tut las scolas en il chantun èn sa participadas als tests durant il semester passà. Fin ussa n'hai dà naginas retratgas. Ils tests vegnan realisads sin basa d'ina voluntariadad dubla: Tant las scolas sco er las persunas responsablas per l'educaziun decidan davart la participaziun. Durant l'onn da scola passà èn vegnids evaluads en media 1800 pools per emna. Var 22 000 scolaras e scolars sco er persunas d'instrucziun han pudì vegnir testads mintga emna sin COVID-19.

Fin ussa èn vegnids testads 27 000 pools en il rom dals tests en las scolas. En quest connex èn vegnids eruids 136 cas singuls positivs. Las chadainas d'infecziun èn vegnidas interruttas correspundentamain. Tras ils vasts tests en las scolas èsi stà pussaivel da mantegnair da tut temp l'instrucziun da preschientscha sco er d'impedir bunamain dal tuttafatg che scolas u classas avessan stuì vegnir serradas pervia d'infecziuns cun il coronavirus.

Ils sets da test adempleschan las autas pretensiuns da l'autoritad da medicaments Swissmedic
Ils tests en las scolas en il Grischun vegnan realisads er vinavant cun tests da spida PCR. Per l'onn da scola 2021/22 vegnan applitgads dapertut sets da test cun ina soluziun d'aua da sal separada (certificat CE). Quests sets adempleschan las autas pretensiuns da l'autoritad da medicaments Swissmedic ed èn admess per tests repetitivs en las scolas.

Procedura d'annunzia simplifitgada
En ina procedura d'annunzia simplifitgada pon las persunas responsablas per l'educaziun annunziar lur uffants per ils tests regulars sur in code QR u sur in weblink. En cas ch'il resultat d'in pool è positiv, ston las scolaras ed ils scolars anc far tests individuals. Las direcziuns da scola infurmeschan davart ils resultats dals tests dals pools. Davart ils resultats d'eventuals tests posteriurs individuals vegnan las persunas responsablas per l'educaziun infurmadas directamain per SMS.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Responsabladad: Uffizi da sanadad

Neuer Artikel