La Regenza ha tramess en consultaziun il sboz tar la revisiun totala da la Lescha davart la promoziun da la tgira d'uffants cumplementara a la famiglia. Cun la revisiun totala duai vegnir reglada da nov la finanziaziun da la tgira d'uffants cumplementara a la famiglia en la vegliadetgna prescolara. Decisiva per il nov model da finanziaziun è la midada da sistem en la distribuziun dals meds finanzials publics da la finanziaziun da l'object a la promoziun sin basa da la finanziaziun dal subject.

Che tuttas duas schlattainas han in'activitad professiunala è ozendi ina pretensiun da la societad. La tgira d'uffants cumplementara a la famiglia è en quest connex in instrument central per garantir la cumpatibilitad da la professiun cun la famiglia e per cumbatter la mancanza da persunas spezialisadas. La tgira d'uffants cumplementara a la famiglia promova ils uffants en lur svilup e sustegna lur integraziun sociala.

Ensemen cun las vischnancas promova il chantun Grischun la tgira cumplementara a la famiglia. Uschia duai la tgira d'uffants cumplementara a la famiglia esser finanziabla ed accessibla per las persunas responsablas per l'educaziun en tut il chantun. L'examinaziun dal model actual da finanziaziun ha mussà ils cunfins da tal e cumprovà il basegn d'agir per ina soluziun solida e moderna.

Midada da sistem tar la finanziaziun
Oz vegnan las furnituras da prestaziuns da la tgira d'uffants cumplementara a la famiglia, sco canortas d'uffants u organisaziuns da geniturs da di, subvenziunadas da las vischnancas e dal chantun cun contribuziuns da basa. Cun midar il sistem sustegnan las vischnancas ed il chantun las persunas responsablas per l'educaziun directamain cun reducziuns dals custs che dependan da lur capacitad economica e da lur situaziun d'entrada.

Il nov model da finanziaziun garantescha ch'ils meds finanzials publics vegnian impundids en moda effizienta e porscha al chantun sco er a las vischnancas instruments directivs adattads per meglierar la cumpatibilitad da la famiglia cun l'activitad da gudogn sco er la promoziun dal svilup dals uffants. Las vischnancas survegnan supplementarmain la pussaivladad d'augmentar lur attractivitad sco lieu d'abitar grazia a reducziuns pli autas dals custs u da persequitar atgnas finamiras da promoziun.

Las canortas d'uffants vegnan distgargiadas e profiteschan da dapli segirezza da planisaziun
Il nov model stgaffescha las medemas situaziuns da partenza per tut las canortas d'uffants e per tut las organisaziuns da geniturs da di en il chantun. Las ristgas per las furnituras da prestaziuns en territoris cun structuras deblas u per furnituras da prestaziuns cun ina gronda quota da persunas responsablas per l'educaziun ch'èn economicamain dischavantagiadas vegnan minimadas e lur planisabladad vegn meglierada. La lavur administrativa actualmain gronda da las canortas d'uffants e da las organisaziuns da geniturs da di per retschertgar las datas fiscalas da las persunas responsablas per l'educaziun croda. Las datas fiscalas sensiblas da las persunas responsablas per l'educaziun restan tar il maun public e na ston betg pli vegnir preschentadas a las furnituras da prestaziuns.

La consultaziun dura fin ils 25 da november 2021. Ils documents pon vegnir consultads sin la pagina d'internet dal chantun Grischun.

Infurmaziuns:

Responsabladad: Regenza