Quest onn ha il president da la Regenza Mario Cavigelli manà la Regenza en la Foppa ed en Val Lumnezia. La Regenza ha visità la vischnanca burgaisa da Cavigelli, Glion, ed ha guardà l'anteriura baselgia da tut la Val Lumnezia «Sogn Vintschegn» a Pleif/Vella sco er differents ulteriurs edifizis sacrals en Val Lumnezia.

Per la sesida champestra da quest onn ha la Regenza fatg viadi a Glion ed en Val Lumnezia. Accumpagnada da la presidenta communala Carmelia Maissen sco er d'ulteriuras commembras e d'ulteriurs commembers da la suprastanza communala da la vischnanca da Glion ha ella visità l'emprim di la citad veglia da Glion. Là ha ella er scuntrà l'interprendider ed investider Theo Schaub ch'è sa tschentà la finamira da mantegnair ils edifizis da la citad veglia da Glion ch'èn prezius per il maletg da la citad e d'als attribuir a novas utilisaziuns e per part ad utilisaziuns publicas.

Il segund di han ils commembers da la Regenza ed il chancelier visità l'anteriura baselgia da tut la Val Lumnezia «Sogn Vintschegn» a Pleif/Vella ed han visità silsuenter differents ulteriurs edifizis sacrals en Val Lumnezia. Per finir è la Regenza sa permessa da prender ina pitschna buccada tar il cusseglier guvernativ Marcus Caduff e da sa barattar cun il president communal da Lumnezia Daniel Solèr e cun ulteriuras commembras ed ulteriurs commembers da la suprastanza communala da la vischnanca da Lumnezia.

Fotografia agiuntada:

Infurmaziuns:

president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch

Responsabladad: Regenza