La Regenza ha deliberà la missiva per la participaziun a la Cunvegna interchantunala revedida davart las acquisiziuns publicas (CIAP) sco er il relasch d'ina Lescha introductiva tar la CIAP (LItCIAP) per mauns dal Cussegl grond. Medemamain ha ella deliberà in rapport davart las incaricas da las prestaziuns da servetsch dal chantun che vegnan surdadas en la procedura directa ed en la procedura d'invit.
A chaschun da lur radunanza speziala ils 15 da november 2019 han ils chantuns deliberà unanimamain la revisiun da la Cunvegna interchantunala davart las acquisiziuns publicas (CIAP). Cun la revisiun da la CIAP vegn mess il crap da fundament per armonisar il dretg d'acquisiziun en Svizra.
Armonisaziun dal dretg d'acquisiziun
En la consultaziun chantunala è la CIAP vegnida recepida per gronda part en moda positiva. Spezialmain beneventà vegni ch'il chantun presta – cun la participaziun a la CIAP – ina contribuziun impurtanta per armonisar il dretg d'acquisiziun en Svizra. Da quai profitian en plirs reguards tant l'economia sco er ils posts d'acquisiziun. Ils giavischs ch'èn vegnids formulads en la consultaziun han ins per gronda part pudì resguardar ed integrar en il project. Cun questa realisaziun ademplescha il chantun er ina recumandaziun da la CPI «Cartel da construcziun». Grazia a la realisaziun da la CIAP, che vegn prendida en mira, vegnan unifitgadas per gronda part las prescripziuns dal dretg interchantunal d'acquisiziun. Ultra da quai è la revisiun da la CIAP in'assimilaziun cumplessiva a la Lescha federala revedida davart las acquisiziuns publicas (LAP), ch'è entrada en vigur il 1. da schaner 2021.
En il senn d'ina execuziun uschè unitara sco pussaivel dal nov dretg d'acquisiziun èn la Confederaziun, ils chantuns e las vischnancas plinavant londervi d'elavurar in mussavia cuminaivel davart las acquisiziuns, quai sco impurtant agid pratic.
Finamiras da la revisiun
HLas finamiras principalas da la revisiun da la CIAP èn ultra da l'armonisaziun dals differents urdens d'acquisiziun dals chantuns e da la Confederaziun ed ultra da la realisaziun parallela da la Convenziun da la WTO davart las acquisiziuns publicas (CAP), ch'è vegnida revedida l'onn 2012, la modernisaziun e la flexibilisaziun dal dretg davart las surdadas publicas. Plinavant vegn la pratica da cumpra dal maun public concepida pli fitg tenor princips da la persistenza, tenor la concurrenza da la qualitad empè dals pretschs sco er resguardond soluziuns innovativas. Uschia vegni dà dapli paisa a las fermezzas dal mastergn indigen.
Economia grischuna vegn resguardada fermamain tar surdadas publicas en il chantun
Ultra da la participaziun dal chantun a la CIAP ha la Regenza deliberà ina segunda missiva al Cussegl grond davart il tema da las acquisiziuns. En quest rom dat ella pled e fatg al Cussegl grond tranter auter davart la dumonda, quantas incaricas da prestaziuns da servetsch – ordinadas tenor departament e tenor uffizi – ch'èn vegnidas surdadas durant ils onns 2014 fin 2016 ad offerents extrachantunals en la procedura directa ed en la procedura d'invit. Plinavant mussa la Regenza, tge criteris che vegnan applitgads per envidar offerents da far offertas en la procedura directa ed en la procedura d'invit. Il motiv per quest rapport è ina incumbensa dal Cussegl grond a la Regenza dals 14 da zercladur 2017. La Regenza è er vegnida incumbensada da mussar, co ch'il mastergn grischun pudess vegnir resguardà pli fitg tar las futuras surdadas d'incaricas.
Il rapport da la Regenza mussa ussa che l'economia grischuna po vegnir resguardada gia oz fermamain tar las surdadas publicas e ch'ella profita supplementarmain da la participaziun a la nova CIAP. Tuttina duain vegnir realisadas mesiras per augmentar las schanzas da las interpresas grischunas da survegnir incaricas en il rom da l'introducziun dal nov dretg d'acquisiziun ed i duain restar avertas pussaivladads per examinar e per realisar eventualas ulteriuras mesiras. Uschia vul la Regenza surpigliar sia responsabladad politica da prestar – en il senn da la persistenza da l'economia publica – ina contribuziun periodica per rinforzar il mastergn regiunal e local.
La debatta davart la missiva sco er davart il rapport è previsa en la sessiun da december 2021 dal Cussegl grond.
Agiuntas:
missiva per la participaziun a la Cunvegna interchantunala revedida davart las acquisiziuns publicas (CIAP)
rapport davart las incaricas da las prestaziuns da servetsch che vegnan surdadas en la procedura directa ed en la procedura d'invit
Infurmaziuns:
president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
Responsabladad: Regenza