Ils 15 e 16 d'october 2021 ha lieu a Cuira la concurrenza da raiver sportiv da la ARGE ALP. Var 130 dals megliers sportists e sportistas da las regiuns da la ARGE ALP, Baviera, Lumbardia, Salzburg, Tirol dal Sid, Tessin, Tirol, Trient, Vorarlberg e Grischun sa mesiran en las categorias U12, U14 ed U16.
Suenter che l'occurrenza ha gì lieu l'ultima giada il 2013 a Küblis, s'inscuntran las sportistas ed ils sportists questa giada en il center da raiver Ap'n Daun a Cuira. Venderdi, ils 15 d'october, a las 17.00 ha lieu la festa d'avertura cun in marsch da la bandiera da tut las participantas ed ils participants davent da la plazza d'Arcas fin al restaurant Marsöl. A participar a la festa d'avertura vegn er il cusseglier guvernativ Jon Domenic Parolini. La concurrenza sco tala cumenza la sonda, ils 16 d'october, a las 08.30 en il center Ap'n Daun. La proclamaziun dals rangs vegn ad esser enturn las 16.30.
Concurrenzas sportivas plain success en las Alps
Las concurrenzas da sport annualas da la ARGE ALP èn fitg popularas. Il project curunà da success vegn manà da l'Uffizi per la scola populara ed il sport dal chantun Grischun. Las diversas concurrenzas da sport han lieu mintgamai decentralmain en differents pajais commembers da la ARGE ALP. Ils gieus d'enviern cumpiglian mintgamai ski alpin, hockey sin glatsch e patinadi artistic. Durant il semester da stad suondan ballape, in turnier da ballape per persunas cun impediments, tir da sport, atletica leva, cursa d'orientaziun sco er raiver sportiv.
La Cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin e da sviluppar vinavant questa conscienza en moda persistenta per il bain da las abitantas e dals abitants. La ARGE ALP è vegnida fundada il 1972 en il Tirol. Dad ella fan part diesch pajais/regiuns/chantuns e provinzas autonomas dals stadis Austria, Germania, Italia e la Svizra. Commembers èn ils chantuns Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las provinzas autonomas Trient, Bulsaun-Tirol dal Sid e la regiun Lumbardia. La ARGE ALP cumpiglia bunamain 26 milliuns persunas che vivan sin 142 366 km2. Presidiada vegn la ARGE ALP mintgamai per in onn d'in da ses commembers.
Ulteriuras infurmaziuns:
www.argealp-sport.org;
www.argealp.org
Infurmaziuns:
Beat Tschalèr, Uffizi per la scola populara ed il sport, grischunSPORT, tel. +41 81 257 27 56, e-mail Beat.Tschaler@avs.gr.ch
Responsabladad: Uffizi per la scola populara ed il sport