A partir da glindesdi proxim è la vaccinaziun da rinfrestgament pussaivla per tut las abitantas ed ils abitants da 16 onns e dapli ch'èn gia vaccinads cunter COVID-19. Las vaccinaziuns da rinfrestgament, in augment dal dumber da letgs da tgira intensiva e la cuntinuaziun dals tests en ils manaschis ed en las scolas èn ils elements ils pli impurtants dal concept chantunal da protecziun che la Regenza grischuna ha concludì per ils mais d'enviern. En vista a la situaziun critica appellescha l'Uffizi da sanadad d'observar en mintga cas las mesiras d'igiena enconuschentas.
Per dumagnar la pandemia dal coronavirus sa basa il chantun Grischun l'enviern proxim sin in concept da protecziun cumplessiv. La Regenza vul franar duraivlamain ils dumbers d'infecziuns cun agid da mesiras sistematicas, senza che mesiras rigurusas sco scumonds restrenschian puspè la vita publica. Per il «Concept da protecziun enviern 2021/2022» vegni fatg quint cun ina summa tranter 10 e 35 milliuns francs, tut tenor la participaziun da la Confederaziun als custs dals programs da vaccinaziun e da test. Il credit posteriur correspundent sto vegnir approvà da la Cumissiun da gestiun dal Cussegl grond (CdG).
Tut las mesiras han la finamira d'impedir ch'il sistem da sanadad vegnia surchargià. Plinavant duai la stagiun turistica d'enviern, ch'è impurtanta per il Grischun, vegnir concepida en moda uschè segira e cun uschè paucas difficultads sco pussaivel. Quai vegn ad esser pussaivel mo, sch'ils dumbers da cas sa reduceschan puspè cleramain.
Vaccinaziun da rinfrestgament per persunas a partir da 16 onns uschè svelt sco pussaivel
Il chantun ha gia pudì injectar 8100 vaccinaziuns da rinfrestgament a persunas da 65 onns e dapli. Questa purschida vegn ussa extendida ulteriuramain. Plinavant quintan las persunas responsablas che tut las permissiuns da la Confederaziun sajan avant maun fin il pli tard il cumenzament da l'emna proxima, per che tut las persunas a partir da 16 onns, che han survegnì l'immunisaziun da basa avant passa 6 mais, possian vegnir provedidas cun ina terza vaccinaziun.
Per franar la pandemia è la vaccinaziun da rinfrestgament cunvegnenta per tuttas e tuts. Ella vegn recumandada cunzunt a las persunas da 65 onns e dapli, perquai che l'effect da protecziun cunter in grev decurs da la malsogna è sa reducì tar ellas pli fitg che tar persunas pli giuvnas.
Sa laschar vaccinar pon ins en ils nov centers da vaccinaziun dal Grischun, tar las medias ed ils medis da chasa sco er en las apotecas. Avant ils firads duain uschè bleras abitantas ed abitants sco pussaivel survegnir ina immunisaziun da basa u ina vaccinaziun da rinfrestgament. La pagina d'internet chantunala www.gr.ch/vaccinar cuntegna ina survista actuala dals termins da walk-in sco er la pussaivladad da fixar in termin da vaccinaziun.
A partir dal cumenzament da l'onn 2022 vegn la vaccinaziun cunter COVID previsiblamain organisada en las structuras existentas en ils centers da vaccinaziun, tar las medias ed ils medis da chasa sco er en las apotecas. L'onn 2022 vegn l'Uffizi da sanadad a porscher vinavant support logistic e specific. L'uffizi na vegn dentant betg pli a metter a disposiziun teams da vaccinaziun.
Center da vaccinaziun «pop up» e persunal supplementar per la staziun intensiva a Cuira
Sper ils posts da vaccinaziun existents maina il chantun fin la fin da l'onn in center da vaccinaziun da walk-in supplementar a la Rheinfelsstrasse 5 a Cuira (Cuira Vest). Quest center da vaccinaziun «pop up» porscha tut ils trais vaccins sco er emprimas vaccinaziuns, segundas vaccinaziuns e vaccinaziuns da rinfrestgament. Quai mintgamai da glindesdi fin venderdi, da las 10.00 fin las 14.00 e da las 15.00 fin las 19.00, sco er las sondas da las 10.00 fin las 16.00. Tge vaccins che vegnan mintgamai purschids, vegn publitgà sin la pagina d'internet chantunala.
En collavuraziun cun l'Ospital chantunal dal Grischun planisescha la Regenza da recrutar persunal medicinal spezialisà per dus letgs supplementars sin la staziun intensiva. Actualmain dispona il chantun Grischun da persunal e da letgs per maximalmain 16 plazzas da tgira intensiva.
In vast program da tests gida a franar la pandemia
Il vast program grischun da tests en ils manaschis ed en las scolas è s'integrà en il mintgadi da lavur e da scola e vegn acceptà fitg bain. Actualmain sa participeschan var 3540 interpresas cun var 45 800 lavurantas e lavurants sco er 167 scolas cun var 21 100 scolaras, scolars e persunas d'instrucziun als tests regulars.
Il Cussegl federal ha empermess da finanziar ils tests en las scolas fin la primavaira 2022. La Regenza grischuna è plinavant da l'avis ch'i saja raschunaivel da cuntinuar cun ils tests en ils manaschis durant l'entira stagiun d'enviern. D'ina vart servan ils tests sco indicaturs per il svilup epidemiologic, da l'autra vart permettan els d'identifitgar infecziuns asintomaticas ed uschia d'interrumper svelt chadainas d'infecziun currentas. En cas che la Confederaziun smetta da finanziar ils tests en las scolas ed en ils manaschis, vegnan quests tests tuttina mess a disposiziun gratuitamain e finanziads tras il chantun.
Il project «Monitoring da SARS-CoV-2 en l'aua persa» vegn cuntinuà fin la fin da l'onn 2022. L'observaziun da la pandemia sur l'aua persa ha l'avantatg che tut la populaziun da l'intschess da la serenera vegn tratga en consideraziun. Il monitoring da l'aua persa duai vegnir sviluppà ad in sistem da preavertiment per las vischnancas.
Certificats gratuits sin basa dals tests en ils manaschis
Ils certificats COVID sin basa dals tests en ils manaschis restan previsiblamain gratuits fin la fin da la stagiun d'enviern, perquai che las basas giuridicas na permettan betg d'incassar custs per certificats da tests. Pervia dals gronds volumens da tests en ils labors na poi dentant betg vegnir garantì ch'ils certificats COVID gratuits sin basa dals tests en ils manaschis vegnian consegnads entaifer 48 uras. A persunas che dovran urgentamain in certificat vegni perquai recumandà da sa render tar in post da test.
L'Uffizi da sanadad sustegna l'extensiun da las capacitads da test tras purschiders privats
En vista a la stagiun d'enviern duai esser pussaivel d'augmentar las capacitads da test en il chantun respectivamain da rinforzar las structuras existentas cun agid da purschiders privats. Las vischnancas, las destinaziuns e purschiders privats pon metter a disposiziun capacitads da test supplementaras. L'Uffizi da sanadad surpiglia en quest connex ina funcziun consultativa areguard las basas giuridicas ed areguard la realisaziun pratica da lieus da test.
Il contact tracing mida temporarmain a l'autoregistraziun
En il chantun Grischun èn actualmain 1815 persunas en isolaziun. Pervia dal ferm augment mida il contact tracing a l'autoregistraziun. Entant ch'i vegnivan registrads avant in mais anc var 40 cas per di, èn quai actualmain circa 300 cas per di. Malgrà ina duplicaziun dal persunal, malgrà in'extensiun da las capacitads dals locals e malgrà il sustegn da la Protecziun civila, s'augmenta cuntinuadamain la quota da persunas che na pon betg pli vegnir contactadas entaifer 24 fin 48 uras. En vista a la situaziun vegnan las bleras persunas cun in test positiv ussa contactadas per SMS e supplitgadas da registrar sasezzas per survegnir in'ordinaziun. Sco ulteriura mesira immediata vegnan cas pli vegls contactads ad interim mo pli per SMS.
L'Uffizi da sanadad appellescha perquai a l'atgna responsabladad da tuttas e da tuts e cusseglia urgentamain da tegnair ina distanza minimala dad 1,5 meters, da sa proteger cun mascrinas per la fatscha, da lavar regularmain ils mauns sco er d'evitar fullas da glieud.
Agiunta:
Preschentaziun
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Regenza / Stab directiv chantunal dal Grischun