La Regenza ha garantì a la fundaziun Institut da perscrutaziun AO Tavau (ARI) ina contribuziun chantunala da totalmain 1,05 milliuns francs per ils onns 2022 fin 2024. Plinavant duai l'incarica da prestaziun existenta, che scada la fin da l'onn 2021, vegnir prolungada fin l'onn 2024.
La AO Foundation è in'organisaziun ch'è activa sin tut il mund en il sectur da la perscrutaziun e da la scolaziun medicinala. Sia finamira è quella da sviluppar vinavant il tractament da ruttadiras d'ossa e da malsognas da l'apparat motoric. La fundaziun è vegnida fundada l'onn 1953 da 13 medis da l'Ospital chantunal. Cun passa 15 000 chirurgas e chirurgs furma la AO Foundation oz sin plaun internaziunal ina da las raits las pli impurtantas entaifer la branscha medicinala. Ils princips da lavur che la AO Foundation ha sviluppà èn ina pitga fundamentala da la chirurgia d'accidents moderna. Sco institut il pli grond da la AO Foundation ha il ARI ina plazza a la testa globala en ses champs da perscrutaziun. Questa reputaziun scientifica contribuescha essenzialmain a la reputaziun internaziunala dal chantun Grischun sco plazza da perscrutaziun impurtanta. Ultra da quai porscha il ARI actualmain passa 70 plazzas da lavur per perscrutadras e perscrutaders, per emprendistas ed emprendists, per fellows sco er per praticantas e praticants.

©AO Foundation

La Regenza ha approvà l'incarica da prestaziun 2022 fin 2025 dal chantun Grischun per mauns da la Crusch cotschna svizra dal Grischun, «Post spezialisà per l'integraziun en il mund da lavur – Rait sociala», ed ha concedì ina limita da custs da 305 000 francs per onn. L'incarica da prestaziun entra en vigur il 1. da schaner 2022 e vala fin ils 31 da december 2025.
La Crusch cotschna svizra dal Grischun è in'uniun independenta che s'engascha en il sectur social ed en la promoziun da la sanadad per ils umans en il chantun Grischun. Il «Post spezialisà per l'integraziun en il mund da lavur – Rait sociala» cusseglia e promova persunas che survegnan in sustegn da dretg public, tar lur return en il mund da lavur.

La Regenza ha approvà il project «Protecziun cunter crudada da crappa Surava» da la vischnanca d'Alvra. Da la paraid-crap Crappa da Lauas sur Surava èn sa distatgads en il passà pliras giadas crappa e blocs. Per part è quest material rudlà giu fin tar il trassé da la Viafier retica u fin tar la via chantunala ed ha cuntanschì las chasas en la part sura dal vitg. La finamira da quest project è pia er quella da garantir la protecziun dal territori d'abitadi, da la lingia da viafier sco er da la via chantunala en la part sura da Surava. Per quest intent duai il territori vegnir segirà tras dus rempars d'ina autezza da 4,2 meters e d'ina lunghezza totala da 270 meters sco er tras duas raits cunter crudada da crappa d'ina autezza da 5 meters e d'ina lunghezza totala da 110 meters. Il chantun sa participescha cun ina contribuziun da maximalmain var 1,62 milliuns francs als custs budgetads da var 1,96 milliuns francs.

©Viafier retica

La Regenza ha garantì contribuziuns pauschalas or dal fond da sport a las commembras ed als commembers da la federaziun da tetg dal sport grischun. Cun questas contribuziuns duai vegnir promovida la lavur generala da federaziun e d'uniun. A tut en tut 45 federaziuns ed organisaziuns da sport vegn concedida – sco l'onn precedent – ina summa totala dad 1 milliun francs. Da quest sustegn or dal fond da sport profitan tut en tut 43 300 persunas creschidas e 20 658 uffants e giuvenils en 582 uniuns.

Plinavant ha la Regenza concedì ina contribuziun da maximalmain 210 000 francs or da la finanziaziun speziala Sport (FS Sport) per il project «Polysport-Programm 0712». Cun questa contribuziun duain vegnir sustegnidas ils proxims trais onns las uniuns che stgaffeschan purschidas en il sectur polisportiv per uffants da 7 fin 12 onns. La finamira è quella d'augmentar sco er d'extender purschidas multifaras correspundentas en tut il chantun. Il project «Polysport-Programm 0712» vegn coordinà da graubündenSPORT.

Per ils campiunadis mundials da cursa d'orientaziun da l'onn 2023 en la regiun da Flem Laax ha la Regenza concedì a l'uniun «OL WM 2023 Flims Laax» ina contribuziun da maximalmain 100 000 francs or da la FS Sport. Quella vegn duvrada per far 19 chartas da cursa d'orientaziun. L'uniun organisescha dals 11 fin ils 16 da fanadur 2023 ils campiunadis mundials da cursa d'orientaziun, als quals tut l'elita mundiala vegn a sa participar. Suenter ha lieu dals 16 fin ils 22 da fanadur 2023 en la medema regiun la cursa d'orientaziun internaziunala da plirs dis Swiss Orienteering Week ch'è ina da las occurrenzas da cursa d'orientaziun las pli grondas da l'entir mund. Spetgads vegnan 3500 participantas e participants. Las chartas da trenament e da concurrenza per questas cursas ston vegnir elavuradas da nov u repassadas.

La Regenza ha approvà la revisiun parziala da l'Ordinaziun dal persunal e la revisiun totala dal Reglament davart il pensiunament anticipà (Reglament PA). Cun il conclus dals 26 d'avust 2021 ha il Cussegl grond deliberà ina revisiun parziala da la Lescha davart la Cassa da pensiun dal Grischun (LCPG). Quella cuntegna er midadas tar las contribuziuns da spargn, quai che premetta in'adattaziun da l'Ordinaziun dal persunal (OP).
En il rom d'ina midada en in auter relasch, numnadamain en la Lescha davart la relaziun da lavur da las collavuraturas e dals collavuraturs dal chantun Grischun, ha il Cussegl grond ultra da quai adattà il sectur dal pensiunament anticipà. Pervia dal svilup demografic e pervia da la mancanza da persunas spezialisadas duain las collavuraturas ed ils collavuraturs restar en il process da lavur da princip almain fin a la vegliadetgna da pensiun ordinaria. Perquai che las contribuziuns a la cassa da pensiun e las prestaziuns da la cassa da pensiun s'augmentan, ston vegnir adattadas la concessiun e la finanziaziun da las rentas transitoricas da la AVS en il rom d'in pensiunament anticipà. Da nov pon las collavuraturas ed ils collavuraturs sa laschar pensiunar cumplainamain u parzialmain il pli baud per la fin dal mais ch'ellas ed els cumpleneschan 60 onns. In pensiunament anticipà a partir da 62 onns po vegnir sustegnì finanzialmain cun ina contribuziun ad ina renta transitorica da la AVS. La Regenza regla ils detagls, en spezial in eventual dretg da prestaziun e l'autezza da la contribuziun.
La Regenza ha mess en vigur la revisiun parziala da la LCPG per il 1. da schaner 2022 ensemen cun questa revisiun parziala da la OP e cun questa revisiun totala dal Reglament davart il pensiunament anticipà.

La Regenza ha mess en vigur la revisiun parziala da la Lescha introductiva tar il Cudesch civil svizzer (LItCCS) concernent il register funsil per il 1. da schaner 2022 ed ha approvà la revisiun parziala respectiva da l'Ordinaziun davart il register funsil en il chantun Grischun (OCRF).
Cun questa revisiun vegn realisada ina incumbensa dal Cussegl grond che aveva pretendì d'abolir la limitaziun da consultaziuns da proprietarias e proprietaris da bains immobigliars. Da nov dependa il dumber da consultaziuns dals basegns da las utilisadras e dals utilisaders. Utilisadras ed utilisaders occasiunals pon far 10 consultaziuns per di. Las persunas che han in basegn supplementar, pon sa registrar e silsuenter far 50 consultaziuns da bains immobigliars per di.

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 13 da favrer 2022:

• iniziativa dal pievel dals 18 da mars 2019 «Gea al scumond da far experiments cun animals e cun umans – Gea a metodas da perscrutaziun che favuriseschan la segirezza ed il progress»;
• iniziativa dal pievel dals 12 da settember 2019 «Gea a la protecziun dals uffants e dals giuvenils cunter la reclama da tubac (Uffants e giuvenils senza reclama da tubac)»;
• midada dals 18 da zercladur 2021 da la Lescha federala davart las taxas da bul (LTB);
• Lescha federala dals 18 da zercladur 2021 davart in pachet da mesiras a favur da las medias.

Sin plaun chantunal n'èn previs nagins projects da votaziun per ils 13 da favrer 2022.