En il chantun Grischun vegn extendida la purschida da vaccinaziuns da rinfrestgament durant ils dis da festa. A partir da mesemna, ils 22 da december 2021, è il center da vaccinaziun a la Rheinfelsstrasse 5 a Cuira avert fin la fin da l'onn da las 09.00 fin las 19.00. Er ils 24 ed ils 31 da december èsi pussaivel da sa laschar vaccinar là, e quai da las 08.00 fin las 12.00. Fin la fin da l'onn porscha er l'Ospital da la Crusch pussaivladads supplementaras da sa laschar vaccinar senza termin; fin ils 23 da december mintgamai l'avantmezdi. Las uras d'avertura dals ulteriurs centers da vaccinaziun a Tusaun, San Murezzan, Schiers, Glion, Tavau, Poschiavo e Grono èn publitgadas sut www.gr.ch/vaccinar. Ils 25 e 26 da december èn ils centers da vaccinaziun serrads.

En il center da vaccinaziun «walk-in» survegnan persunas che vulan sa laschar vaccinar, lur vaccinaziun preventiva senza preannunzia. Sin la pagina d'internet www.gr.ch/vaccinar pon ins er reservar ordavant in termin fix. Vaccinà vegni er en las apotecas ed en las praticas da medias e medis. Suenter la decisiun dal Cussegl federal e sin basa da la recumandaziun che vegn spetgada oz da la Cumissiun federala per vaccinaziuns (CFV) èsi pussaivel da laschar rinfrestgar la vaccinaziun a partir dad oz suentermezdi gia 4 mais suenter l'immunisaziun da basa – quai cun fixar in termin (annunzia online pussaivla a partir da mesemna a mezdi) u er senza termin en il center da vaccinaziun «walk-in». Per persunas indecisas vegn purschida er vinavant ina cussegliaziun da vaccinaziun gratuita al lieu, e quai en tut ils centers da vaccinaziun en il chantun.

Centers da vaccinaziun «walk-in» durant ils dis da festa:

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)

Responsabladad: Uffizi da sanadad