Navigation

Inhaltsbereich

  • Erste Mitteilung
  • Neuen Beitrag einfügen

Avant e durant Pasca vegn l'aura en las Alps ad esser plitost sitga, cun tendenza da favugn. L'Uffizi da guaud e privels da la natira cusseglia perquai urgentamain da desister da far fieus per grillar en cas da ferm favugn. En las regiuns pli bassas al nord da las Alps sco er en l'Engiadina ed en la Val Müstair è il privel d'incendis da guaud e da cultira gia ussa considerabel e dastgass anc crescher cun las temperaturas chaudas. Ina recreaziun da la setgira acuta n'è betg en vista. Las pitschnas quantitads da plievgia ch'igl ha dà ils ultims dis na bastan lunschor betg per meglierar la situaziun.

Per la Mesolcina, per la Val Calanca, per il Puschlav e per la Bregaglia sco er per l'entir chantun Tessin vala dapi ils 13 da schaner 2022 in scumond absolut da far fieu al liber. Dapi la fin dal november passà n'hai dà naginas precipitaziuns pli grondas pli al sid da las Alps. Las prognosas da l'aura sur Pasca n'annunzian betg ina meglieraziun da la setgira al sid. Per entant resta mintga gener da fieu al liber scumandà en il sid.

Malprecauziun sco grond privel
Pervia da la setgira chatscha la vegetaziun cun retard. Fegliom setg, ervas e chaglias sitgas da l'onn passà pon perquai pigliar facilmain fieu. Pervia da malprecauziun hai dà las ultimas emnas intgins incendis da cultira e da guaud en il Grischun. Ils pumpiers han gia stuì vegnir intginas giadas en acziun pervia da cigarettas bittadas davent malprecautamain u pervia da fuclars betg stizzads correctamain. Perquai na dastgan ins mai bittar davent malprecautamain products da fimar e battafieus. Fieus en fuclars fixs ston vegnir observads da tut temp e ston esser stizzads dal tuttafatg, avant ch'els vegnan bandunads.

Ulteriuras infurmaziuns e la valitaziun da la situaziun actuala stattan a disposiziun sin la pagina d'internet da l'Uffizi da guaud e privels da la natira.

Infurmaziuns:

Andrea Kaltenbrunner, Surveglianza dal guaud, Uffizi da guaud e privels da la natira, tel. +41 81 257 38 68, e-mail Andrea.Kaltenbrunner@awn.gr.ch


Responsabladad: Uffizi da guaud e privels da la natira

Neuer Artikel