La Regenza ha prendì posiziun tar il pachet da las ordinaziuns agriculas 2022 dal Departament federal d'economia, furmaziun e retschertga. Il project da consultaziun cuntegna adattaziuns da tut en tut 22 ordinaziuns agriculas. Per il chantun Grischun stattan en il focus dal pachet da las ordinaziuns oravant tut ils dus temas animals da rapina gronds e meglieraziuns da structura.

En general valitescha la Regenza sco positiv il fatg, ch'il project resguarda il basegn d'agir pervia da la preschientscha d'animals da rapina gronds. Ella constatescha dentant, ch'i stoppian vegnir pretendidas ed introducidas ulteriuras pussaivladads per regular la populaziun d'animals da rapina gronds sur la Lescha da chatscha, quai sco element impurtant da la protecziun da muntaneras. Medemamain fa la Regenza attent, che la pussaivladad da stgargiar anticipadamain las alps n'è betg ina mesira da la protecziun da muntaneras. Las adattaziuns proponidas per rinforzar la protecziun da muntaneras vegnan bain sustegnidas da princip. La stgargiada anticipada dastga dentant esser mo ina soluziun d'urgenza transitorica, fin che la Lescha da chatscha permetta in'ulteriura regulaziun da la populaziun dals animals da rapina gronds.

Concernent las meglieraziuns da structura accentuescha la Regenza, che quellas sajan da fitg gronda impurtanza per ils chantuns da muntogna. En vista a las novas sfidas en ils secturs da la protecziun dal clima e da l'adattaziun al clima è in augment dals credits per mesiras da meglieraziuns da structura ordvart impurtant. Perquai sustegna il chantun Grischun mintga mesira necessaria en chaussa.

Link: Documents da consultaziun Departament federal d'economia, furmaziun e retschertga

La Regenza ha relaschà l'Ordinaziun tar la Lescha chantunala davart las mesiras concernent las occurrenzas publicas d'impurtanza surchantunala en connex cun l'epidemia da COVID‑19.

En la sessiun d'avrigl 2022 ha il Cussegl grond tractà la Lescha chantunala davart las mesiras concernent las occurrenzas publicas d'impurtanza surchantunala en connex cun l'epidemia da COVID‑19 e l'ha approvada cun 103 cunter 0 vuschs tar 0 abstenziuns. Il relasch è daventà necessari, perquai che la Confederaziun ha prolungà la protecziun finanziala e perquai che l'ordinaziun vertenta d'urgenza tar la protecziun finanziala scada. Cun cuntinuar cun la protecziun finanziala fin la fin da l'onn 2022 survegnan ils organisaturs d'occurrenzas er vinavant ina segirezza da planisaziun. Quai è surtut da gronda valur, sche la situaziun epidemiologica avess da sa pegiurar danovamain.

Tant la lescha sco er l'ordinaziun vegnan messas en vigur per il 1. da matg 2022.

La Regenza ha approvà il project «Engrondiment dal rempar da lavinas Crap Stagias» da la vischnanca da Medel/Lucmagn ed ha deliberà per quest intent ina contribuziun chantunala da maximalmain 608 000 francs. Il territori dal project sa chatta tranter Mustér ed il Pass dal Lucmagn. Il project vegn realisà en quatter etappas da construcziun e duai vegnir terminà l'onn 2025.

La finamira dal project è quella da garantir la protecziun dal territori abità da la fracziun da Platta e da la via chantunala. Per quest intent duain vegnir construidas otg retschas da rempars da lavinas temporars d'ina lunghezza totala da 460 m. Ultra da quai duai il territori vegnir emplantà. Cun realisar quest project pon las ristgas existentas – en spezial per ils edifizis exponids fermamain – vegnir reducidas considerablamain.  

La Regenza ha approvà trais projects da la vischnanca da Vaz per renovar fermadas dal traffic public per lung da la via dal Güglia e per lung da la Voa davos Lai. Cun construir mintgamai in ur da fermada da 22 centimeters duain las fermadas «Valbella, Canols», «Lenzerheide/Lai, Fadail/Lido» e «Lenzerheide/Lai, Central» vegnir amplifitgadas tenor la Lescha davart l'egualitad da persunas cun impediments. L'entir project vegn a custar circa 838 000 francs.

Sa basond sin las basas legalas ha la vischnanca da Vaz il dretg da diversas contribuziuns chantunalas per realisar il project. D'ina vart conceda la Regenza a la vischnanca ina contribuziun da maximalmain 223 200 francs als custs per construir las nischas da la fermada Valbella, Canols (en omaduas direcziuns). Da l'autra vart garantescha La Regenza a la vischnanca – tenor la Lescha davart il traffic public – contribuziuns da maximalmain 99 600 francs respectivamain da maximalmain 51 600 francs per construir las fermadas Lenzerheide/Lai, Fadail/Lido (en omaduas direcziuns) sco er las fermadas Lenzerheide/Lai, Central (en omaduas direcziuns).