Ina buna partenza en la vita ha in effect persistent. Per che questa partenza gartegia bain per ils uffants e per ils geniturs, èn il chantun, las vischnancas e purtaders privats obligads d'agir. Cun la Strategia per la promoziun tempriva vegn fixada la direcziun cuminaivla e vegnan definidas finamiras impurtantas per la realisaziun.
La Strategia per la promoziun tempriva en il chantun Grischun è elavurada. Ella fa part da la politica d'uffants e da giuvenils en il chantun Grischun. La promoziun tempriva sa referescha a mesiras e purschidas da sustegn en favur dals uffants e da lur geniturs che pertutgan la fasa da vita a partir da la naschientscha fin a l'entrada en la scola obligatorica. Latiers tutgan tranter auter purschidas sco la cussegliaziun da geniturs, canortas d'uffants, gruppas da gieu, la promoziun linguistica, plazzas e purschidas da giugar ed auter pli.
Mument decisiv per la politica d'uffants e da giuvenils
«Cun la Strategia per la promoziun tempriva ha la politica d'uffants e da giuvenils en il chantun Grischun fatg in pass decisiv enavant», declera il president da la Regenza e schef dal Departament d'economia publica e fatgs socials, Marcus Caduff. La Strategia per la promoziun tempriva definescha ina mira cuminaivla per las autoritads e per ils posts spezialisads sin plaun chantunal sco er sin plaun communal e per purtaders privats sco er per persunas spezialisadas. Ella cumpiglia finamiras da la communicaziun, dal portfolio da purschidas, da las raits, da la qualitad sco er da la direcziun e fixescha recumandaziuns per mesiras.
Sco manadra da l'Uffizi dal servetsch social dal Grischun agiunta Susanna Gadient: «Ils emprims onns da vita vegnan creadas premissas impurtantas. I dovra mesiras en il sectur da la promoziun tempriva. Mesiras che creeschan durant l'uffanza tempriva bunas cundiziuns per il svilup». Il chantun garanteschia cun la Strategia per la promoziun tempriva, che tut ils uffants e geniturs en l'entir chantun hajan schanzas da partenza per la vita cumparegliablas.
In process da svilup cun in vast sustegn
La promoziun tempriva è in tema che pertutga plirs plauns statals e departaments, che cumpiglia ils secturs fatgs socials, furmaziun sco er sanadad. Per la politica d'uffants e da giuvenils sco er per la Strategia per la promoziun tempriva è responsabel l'Uffizi chantunal dal servetsch social.
L'orientaziun strategica da la promoziun tempriva è vegnida elavurada en collavuraziun cun posts spezialisads chantunals sco er cun represchentantas ed represchentants da las vischnancas. A chaschun d'ina dieta da rait han vischnancas, purtaders privats e persunas spezialisadas discutà l'atun 2021 mesiras per la realisaziun da la strategia en tut las regiuns dal chantun Grischun. La Scola auta spezialisada da la Svizra Orientala ha accumpagnà scientificamain il project.
Singulas mesiras vegnan gia realisadas, sco per exempel il project da pilot «PAT – Emprender cun geniturs», in program da promoziun preventiv per uffants pitschens da famiglias en situaziuns da ristga psicosocialas.
Agiuntas:
Fotografias agiuntadas:
Foto 2
Fotografias da la dieta da rait per la Strategia per la promoziun tempriva, Cazas, 7 d'october 2021
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 23 01, e‑mail
Marcus.Caduff@dvs.gr.ch (cuntanschibel da las 14.30 fin las 15.30)
Responsabladad: Regenza