La promoziun d'uffants e da giuvenils sustegna il svilup dals uffants e dals giuvenils a persunas independentas e responsablas. Ella promova l'integraziun sociala, culturala e politica dals uffants e dals giuvenils. La promoziun d'uffants e da giuvenils ha lieu tranter auter en la famiglia, en scola, en uniuns ed en la lavur averta cun uffants e cun giuvenils.

Promoziun tempriva en il chantun Grischun

La basa per ch'il svilup da l'uffant gartegia, vegn messa durant l'uffanza tempriva. Questa fasa da la vita porscha tant schanzas per in svilup positiv sco er ristgas per crescher si cun difficultads. Ils conturns dals uffants han ina influenza sin las pussaivladads da svilup individualas e questa influenza na dastga betg vegnir sutstimada.

Entant che conturns favuraivels influenzeschan en moda positiva il svilup dals uffants, uschia ch'els acquistan abilitads multifaras ed emprendan cumpetenzas, po – en il cas cuntrari – in ambient disfavuraivel furmar en moda negativa respectivmain retardar questa prestaziun da svilup.

Partind da questas enconuschientschas scientificas ch'èn vegnidas consolidadas pli e pli fitg ils ultims onns, vegn la fasa da la vita d'uffant pitschen messa adina pli savens en il focus da la politica. En sia analisa da la situaziun davart la politica da l'uffanza tempriva, ch'el ha publitgà l'onn 2021, parta correspundentamain er il Cussegl federal dal fatg che la promoziun tempriva saja actualmain ed er en l'avegnir da gronda impurtanza.

Il chantun Grischun sviluppescha vinavant sia politica d'uffants e da giuvenils cun cleras finamiras ed en moda persistenta. Uschia ha l'Uffizi dal servetsch social elavurà ina strategia per la promoziun tempriva che illustrescha la visiun e la strategia chantunala en connex cun la politica da l'uffanza tempriva.