Differentas instituziuns en il chantun Grischun lavuran en il sectur da la protecziun d'uffants da dretg civil e penal sco er da la protecziun d'uffants voluntara.

Qua sutvart chattais Vus ina survista davart la collavuraziun da las instituziuns cun ils champs d'incumbensas, cun las cumpetenzas e cun las datas da contact respectivas.

Rait per la protecziun d'uffants en il Grischun (mo per tudestg)

• Uffants e giuvenils ch'èn pertutgads da violenza sco er lur confamigliars e las persunas spezialisadas involvidas vegnan cussegliads da l'agid a victimas dal Grischun.
• Mintga persuna po sa drizzar a l'autoritad per la protecziun d'uffants e da creschids, sche uffants èn periclitads e dovran eventualmain agid uffizial. L'autoritad per la protecziun d'uffants po prender mesiras adattadas per la protecziun da l'uffant.
• Dapi il 1. da schaner 2019 èn regladas da nov las prescripziuns concernent las annunzias a l'autoritad per la protecziun d'uffants e da creschids APUC. La finamira da la midada da la lescha è quella da proteger meglier uffants en la vegliadetgna prescolara. In'obligaziun d'annunzia n'han betg mo persunas uffizialas, mabain da nov er persunas che han da professiun in contact regular cun uffants. Ultra da quai è vegnì simplifitgà il dretg d'annunzia da persunas ch'èn suttamessas al secret professiunal. La conferenza per la protecziun da l'uffant e da creschids COPUC ha elavurà in fegl d'infurmaziun (mo per tudestg) davart ils dretgs e davart las obligaziuns d'annunzia a la APUC, mussa las prescripziuns chantunalas d'annunzia (mo per tudestg) e metta a disposiziun in model per far in'annunzia a la APUC (mo per tudestg).
  En il Grischun exista – tenor il dretg chantunal – in'obligaziun d'annunzia per persunas spezialisadas dals secturs medischina, tgira, furmaziun, educaziun, assistenza, cussegliaziun sociala e religiun, sch'ellas survegnan – exequind lur professiun – enconuschientscha dal fatg ch'in uffant u in creschì è periclità da commetter acts da violenza cunter terzas persunas u cunter sasez.