Pervia da las relaziuns geograficas ha quasi mintga scola media en il chantun in internat. Ils internats na dattan betg mo alloschi a giuvenils dal Grischun, mabain er a scolaras e scolars d'auters chantuns svizzers e da l'exteriur. Ils giuvenils dals auters chantuns e da l'exteriur frequentan scolas medias grischunas, perquai ch'els han talents extraordinaris en sport u perquai che las scolas medias privatas porschan scolaziuns individualas per els.

La surveglianza vegn fatga tenor directivas da qualitad e tenor recumandaziuns da qualitad. Las directivas da qualitad han l'intent da drizzar la furniziun da prestaziuns sin la protecziun da la persunalitad e sin l'integritad. Las recumandaziuns da qualitad han l'intent da drizzar la furniziun da prestaziuns sin la transparenza e sin la chapaivladad sco er sin l'integraziun sociala da las scolaras e dals scolars e sin lur capacitad da prestaziun en scola.