En il chantun Grischun profiteschan famiglias d'ina buna purschida da la tgira d'uffants cumplementara a la famiglia. La tgira d'uffants cumplementara a la famiglia sustegna la cumpatibilitad da la professiun cun la famiglia. Ella porscha als uffants ulteriuras pussaivladads da svilup e gida las famiglias a stabilir novs contacts. Per la tgira d'uffants da la vegliadetgna prescolara stattan a disposiziun differentas furmas, tut tenor ils basegns individuals.

Reducziun dals custs da tgira

En il chantun survegnan tut las famiglias reducziuns dals custs per la tgira d'uffants cumplementara a la famiglia en canortas d'uffants renconuschidas u tras uniuns da geniturs dal di renconuschidas. Questas reducziuns dependan da las entradas. Per pajar las reducziuns è cumpetent l'Uffizi dal servetsch social. Dapli infurmaziuns davart il model da finanziaziun tenor la Lescha davart la promoziun da la tgira d'uffants cumplementara a la famiglia en il chantun Grischun (LTGU) chattais Vus en la rubrica Politica

Permissiun

Sch'i vegnan tgirads durant il di u la notg il medem mument quatter u dapli uffants da la vegliadetgna prescolara u scolara, dovri ina permissiun per recepir uffants e giuvenils. Ina permissiun da manaschi vegn concedida, sche las purschidas da tgira observan las prescripziuns da l'Uffizi dal servetsch social. Las prescripziuns cumpletteschan l'Ordinaziun davart il plazzament d'uffants per la tgira e l'adopziun sco er Lescha davart ils uffants confidads dal chantun Grischun.