Sozialamt
Uffizi dal servetsch social
Ufficio del servizio sociale
Reducziun da la tgira d'uffants cumplementara a la famigliaGrabenstrasse 87001 Churtel +41 81 257 53 96quint@soa.gr.ch
Glindesdi fin venderdi, da las 08.00 fin las 12.00 e da las 13.30 fin las 17.00 Tel. +41 81 257 53 96
Gugent dastgais Vus ans scriver in e-mail ordaifer il temp da preschientscha a quint@soa.gr.ch.
Per calcular las reducziuns dals custs stat a disposiziun la software quint. Suenter che Voss uffant è vegnì annunzià tar ina purschida da tgira renconuschida, vegn fatga l'annunzia sur il quint a l'Uffizi chantunal dal servetsch social. Suenter survegnis Vus da l'Uffizi dal servetsch social in e-mail cun l'invitaziun d'endrizzar in conto da quint e da dumandar la reducziun dals custs.
Ellas survegnan la reducziun dal pretsch per la tgira per mintga uffant da la famiglia che viva en la medema chasada. Per famiglia respectivamain per chasada dovri mo ina dumonda da reducziun da pretsch. Sch'i vegn duvrada da nov ina purschida da tgira renconuschida per in uffant fragliun, vala la decisiun existenta da l'emprim uffant er per l'uffant fragliun.
Las purschidas da tgira fixeschan sezzas lur tariffas. Per tut ils uffants d'ina categoria da vegliadetgna ston valair las medemas tariffas. La canorta As metta a quint la tariffa cumplaina minus Vossa reducziun individuala. Vus sco geniturs pajais pia mo l'import reducì. Ina contribuziun minimala als custs da tgira da Voss uffant stuais Vus en mintga cas pajar sezza/sez. La contribuziun minimala per ura da tgira correspunda als custs normads minus la reducziun dals custs la pli auta pussaivla. Sche la contribuziun minimala vegniss sutpassada pervia da la tariffa da la purschida da tgira, vegn la reducziun sbassada. Sch'ella duess vegnir sutpassada pervia da la tariffa da la purschida da tgira, vegn il pajament da la reducziun reducì correspundentamain.
Ils custs normads servan sco basa per calcular la reducziun dal pretsch. Ils custs normads sa basan sin la media dals custs da las purschidas da tgira renconuschidas ed economicas en il chantun Grischun. La basa furman las calculaziuns dals custs controlladas dals ultims 3 onns. Ils custs da taglia sco er las expensas che vegnan messas a quint, sco per exempel ils custs d'alimentaziun, na vegnan betg resguardads en ils custs normads. La regenza fixescha ils custs normads per in'ura da tgira per categoria da vegliadetgna. La chareschia ed il svilup dals salaris vegnan resguardads en il rom da las prescripziuns chantunalas. Ils custs normads per uffants da la vegliadetgna prescolara (a partir da 18 mais fin a lur entrada en il stgalim primar) valan sco basa. Per uffants pitschens (fin 18 mais) èn ils custs normads pli auts per il factur 1,5. Per ils uffants da la scola primara sa smesan ils custs normads a 0,5.
Il chantun transferescha la reducziun dals custs directamain a las canortas. La canorta As metta a quint la tariffa cumplaina minus Vossa reducziun individuala.
La reducziun minimala vegn concedida senza dumonda ed a partir dal cumenzament da la relaziun da tgira, sche l'uffant ha ses domicil en il Grischun e vegn tgirà d'ina purschida renconuschida. Ina dumonda è necessaria, sche la reducziun duai surpassar l'import minimal, sche l'uffant vegn tgirà en ina purschida extrachantunala u sche forzas spezialisadas da l'exteriur vischin laschan tgirar lur uffants en il chantun Grischun. La dumonda sto vegnir inoltrada entaifer 30 dis suenter il cumenzament da la relaziun da tgira, per che la reducziun supplementara dals custs vegnia pajada a partir dal cumenzament da la tgira. Sche la dumonda vegn inoltrada memia tard, vegn la reducziun supplementara concedida pir a partir dal mais che suonda il mais da l'inoltraziun.
En ils suandants cas survegnis Vus ina reducziun dals custs:
Las suandantas paginas d'internet dattan ina survista da las differentas purschidas da tgira renconuschidas:
Ils custs da tgira en gruppas da gieu na vegnan betg reducids. Las gruppas da gieu vegnan finanziadas tras las contribuziuns dals geniturs e tras ulteriuras entradas.
L'Uffizi chantunal dal servetsch social è responsabel per controllar la qualitad da tut las purschidas da tgira. Dapli infurmaziuns en chaussa chattais Vus sin las suandantas paginas d'internet sut il chapitel Permissiun
Sch'ina canorta d'uffants retschaiva in uffant cun impediments, scleri directamain cun la canorta d'uffants da Vossa tscherna. Tenor lescha n'è nagina canorta d'uffants obligada da recepir in uffant cun impediments. Il chantun sustegna las purschidas da tgira cun cussegliaziun e cun concessiun da contribuziuns.
Per quest intent annunzia la canorta d'uffants Voss uffant cun Voss consentiment al program KITAplus. Ina persuna spezialisada dal Servetsch ortopedagogic dal Grischun sclerescha, tge prestaziuns da sustegn ch'èn necessarias per Voss uffant e per il center dal di d'uffants.
Sche Vossa taxaziun da taglia è anc provisorica, survegnis Vus ina decisiun provisorica er per reducziuns dals custs da la tgira d'uffants cumplementara a la famiglia. Cunter la decisiun provisorica da na po vegnir fatg nagin recurs.
Cunter la decisiun definitiva, che Vus survegnis sur Voss conto da quint, pudais Vus far recurs tar l'Uffizi dal servetsch social dal Grischun. Per quest intent stuais Vus dumandar entaifer 30 dis suenter la consegna electronica ina decisiun suttascritta tar l'Uffizi chantunal dal servetsch social. La decisiun As vegn tramessa per posta.
Uffizi dal servetsch social dal Grischun Partiziun Famiglias, uffants e giuvenils Grabenstrasse 8 7001 Cuira quint@soa.gr.ch +41 81 257 53 96
Per conceder las reducziuns dals custs è vegnida sviluppada la software quint. Tut ils process tranter l'Uffizi chantunal dal servetsch social e las purschidas da tgira sco er las persunas responsablas per l'educaziun vegnan liquidads sur quint.
A Voss account quint arrivais Vus qua u via «Uffizi dal servetsch social dal Grischun > Rumantsch > Famiglia, uffants e giuvenils > Tgira d'uffants > Infos per famiglias > Reducziun dals custs da tgira».
Qua pudais Vus metter enavos Voss pled-clav.
Sche Vus avais problems tecnics cun Voss account quint, As drizzai a quint@soa.gr.ch.
Gea. Communitgai en l'annunzia a la canorta d'uffants u a l'uniun da geniturs dal di, che Vus vulais inoltrar Vossa dumonda sin palpiri. Suenter l'annunzia survegnis Vus da l'Uffizi chantunal dal servetsch social ina brev cun infurmaziuns davart l'ulteriur proceder.