Las organisaziuns da geniturs da di intermedieschan geniturs da di a famiglias ed accumpognan las relaziuns da tgira. Els sustegnan ils geniturs da di e las famiglias a far contracts da lavur e da tgira. Plinavant recruteschan els novs geniturs da di ed organiseschan scolaziuns da basa sco er supplementaras. Per ils custs da tgira tras ina famiglia dal di ch'è commembra d'ina organisaziun da geniturs dal di vegnan concedidas reducziuns.

• Glista da las organisaziuns da geniturs dal di

Permissiun

Organisaziuns da geniturs da di dovran ina permissiun. L'Uffizi chantunal dal servetsch social è cumpetent per conceder la permissiun. Ultra da quai ha el la surveglianza. Ina dumonda da permissiun sto vegnir inoltrada en scrit a l'Uffizi chantunal dal servetsch social. Las organisaziuns da geniturs da di pon contactar l'uffizi dal servetsch social sur la suandanta adressa:

Uffizi dal servetsch social chantunal dal Grischun
Famiglia, uffants e giuvenils
Grabenstrasse 8
7001 Cuira
Tel. +41 81 257 26 54
familie@soa.gr.ch

Renconuschientscha

Supplementarmain a la permissiun dovran purschidas da la tgira d'uffants cumplementara a la famiglia en il chantun Grischun ina renconuschientscha, per che las famiglias che fan diever da lur purschida, possian survegnir reducziuns dals custs da tgira. Las premissas per conceder la renconuschientscha èn l'observaziun da las prescripziuns chantunalas davart las tariffas e la correspundenza cun la planisaziun da la purschida. Plinavant èn purschidas renconuschidas confessiunalmain neutralas e betg limitadas a tschertas gruppas.

Admissiun da purschidas extrachantunalas

Per la tgira da canortas d'uffants e d'organisaziuns da geniturs da di admessas extrachantunalas vegnan reducids ils custs. Ina purschida da tgira extrachantunala vegn admessa, sch'ella metta a disposiziun al chantun las infurmaziuns necessarias per exequir la lescha davart la promoziun da la tgira d'uffants cumplementara a la famiglia en il chantun Grischun e sch'ella metta a disposiziun la purschida tras l'autoritad cumpetenta dal chantun respectiv, è confessiunalmain neutrala e betg limitada a tschertas gruppas. Concernent l'admissiun pon purschidas extrachantunalas contactar l'uffizi dal servetsch social sur la suandanta adressa:

Uffizi dal servetsch social dal Grischun
Reducziun da la tgira d'uffants cumplementara a la famiglia
Grabenstrasse 8
7001 Cuira
Tel. +41 81 257 53 96
quint@soa.gr.ch

Finanziaziun

En il chantun Grischun vegnan las canortas d'uffants finanziadas tras tariffas da las persunas responsablas per l'educaziun sco er tras donaziuns e tras contribuziuns da terzas varts. Il chantun conceda a las persunas responsablas per l'educaziun reducziuns dals custs per la tgira d'uffants. Las reducziuns dals custs vegnan pajadas directamain a las purschidas da tgira. Quellas mettan a quint a las famiglias la tariffa cumplaina minus la reducziun individuala. Il Cussegl grond fixescha en il preventiv il credit per finanziar las reducziuns dals custs. Il total da las reducziuns dals custs surpiglian mintgamai per la mesadad il chantun e las vischnancas. La cumpetenza da las vischnancas fixescha il domicil dals uffants tgirads. Per finanziar la tgira d'uffants cumplementara a la famiglia vegnan calculads custs normads. Ils custs normads sa basan sin la media dals custs da las purschidas renconuschidas ed economicas. La basa furman las calculaziuns dals custs controlladas dals 3 onns passads. Plinavant sustegna la confederaziun instituziuns da tgira cun contribuziuns per installar, per extender la purschida sco er per coordinar la tgira en famiglias da di. Infurmaziuns pli detagliadas èn cuntegnidas sin la pagina d'internet da l'uffizi federal d'assicuranzas socialas.

quint

Per conceder las reducziuns dals custs è vegnida sviluppada la software quint. Tut ils process tranter l'Uffizi chantunal dal servetsch social e las purschidas da tgira vegnan liquidads sur quint. L'annunzia dals uffants e las relaziuns da tgira concludidas, l'annunzia da las uras da tgira effectivas (datas d'utilisaziun) sco er il rendaquint da las reducziuns dals custs. Purschidas renconuschidas survegnan access a quint.