La cumissiun predeliberanta propona unanimamain al Cussegl grond da collocar la Dretgira superiura, che resulta tras la fusiun da la Dretgira chantunala e da la Dretgira administrativa, en l'edifizi chantunal a Cuira. Per quest intent sto l'immobiglia vegnir renovada ed engrondida.
En preschientscha dal cusseglier guvernativ Mario Cavigelli, schef dal Departament d'infrastructura, energia e mobilitad, ha la cumissiun dilucidà e deliberà, sut il presidi da Thomas Bigliel, la missiva da la Regenza concernent la «Fusiun da las localitads da las duas dretgiras chantunalas superiuras ad ina nova Dretgira superiura – renovaziun ed engrondiment da l'edifizi chantunal, Cuira» per mauns dal Cussegl grond. La cumissiun è da l'avis, che quest edifizi ch'è istoricamain impurtant per il chantun e ch'è situà en il center, obtegnia – tras la nova Dretgira superiura – in'utilisaziun adequata e degna.
Project general bain gartegià
Sin basa da la dimensiun considerabla dal project, sin basa da la substanza architectonica istorica delicata e sin basa da l'urari relativamain stretg è vegnida realisada ina procedura da selecziun da planisaders. Il project ch'è resultà tras questa selecziun è, tenor il giudicament da la cumissiun, bain gartegià en reguard architectonic. E la cumissiun ha pudì sa persvader, che quest project resguarda ils basegns actuals e previsibels da l'utilisaziun tras ina dretgira. Las consequenzas dal project per la Strategia chantunala d'immobiglias e particularmain l'ulteriur proceder areguard l'Uffizi da construcziun bassa ch'è actualmain collocà en l'edifizi, èn vegnids mess en dumonda, examinads ed approvads da l'entira cumissiun.
La mesadad dals custs èn «custs che fissan insumma resultads»
Ils custs totals per las mesiras architectonicas da tut en tut 29,2 milliuns francs han chaschunà discussiun en la cumissiun. Da quests custs èn var 16 milliuns francs d'attribuir a la restauraziun ed al rinforzament da la substanza architectonica istorica existenta. Per garantir che quest edifizi – ch'era vegnì construì oriundamain sco sedia dal Cussegl grond, da la Banca chantunala grischuna e da la Dretgira chantunala – vegnia tractà cun quità, èn custs da questa autezza commensurads. Plinavant èsi vegnì declerà chapaivlamain che questa renovaziun stoppia insumma vegnir fatga en il proxim temp, quai vul dir independentamain da la furma d'utilisaziun.
Stretg connex cun la Refurma da las dretgiras 3
La renovaziun e l'engrondiment da l'edifizi chantunal èn mo lura raschunaivels e necessaris, sche la Refurma da las dretgiras 3 vegn acceptada dal parlament e dal pievel e sch'i vegn stgaffida ina nova Dretgira superiura. Ina resalva correspundenta en la missiva garantescha quai. Ma da l'autra vart èsi – ord vista da la cumissiun – però fitg impurtant ch'il parlament ed il pievel acceptian la renovaziun da l'edifizi chantunal, per ch'el stettia er propi a disposiziun a la Dretgira superiura il mument da la fusiun.
Il Cussegl grond vegn a tractar il project concernent la renovaziun da l'edifizi chantunal per la nova Dretgira superiura en la sessiun da zercladur 2022.
Infurmaziuns:
President da la cumissiun Thomas Bigliel, tel. +41 78 677 97 37
Responsabladad: Cussegl grond / cumissiun predeliberanta ad hoc