En il rom da ses program da digitalisaziun publitgescha l'Archiv dal stadi dal Grischun novas resursas en l'internet. Ditg curt: var 7000 vopnas da famiglias e 4500 sigils, 160 rapports annuals da la Regenza grischuna dals onns 1849 fin 2009 sco er var 15 700 fotografias ord l'aria da l'anteriur Uffizi da meglieraziun e mesiraziun.
Tgi ch'è descendent d'ina veglia famiglia grischuna, ha ussa bunas schanzas da chattar svelt la vopna da sia famiglia. La collecziun da vopnas da l'Archiv dal stadi è numnadamain la pli gronda da ses gener ed è bunamain cumpletta, nun ch'i sa tractia da novas vopnas creadas pir dacurt. La collecziun da sigils cumplettescha la collecziun da vopnas. Sin ils sigils è ina vopna attestada savens per l'emprima giada. Dal rest è la collecziun da sigils relevanta cunzunt per la perscrutaziun istorica: en cas da documents po ella gidar ad identifitgar las persunas participadas ed a verifitgar l'autenticitad dals acts.
Istorgia ord vista administrativa
Dapi la naschientscha dal chantun l'onn 1803 suttametta la Regenza grischuna mintga onn in rapport da gestiun al Cussegl grond. Principalmain en furma da texts, da tabellas, da statisticas e da graficas vegni rapportà davart l'activitad da la Regenza e da l'administraziun. Fin l'onn 1849 èn ils documents vegnids scrits a maun. Dapi l'onn 1849 vegnan els stampads. Ils rapports stampads dals onns 1849 fin 2009 èn ussa digitalisads e stattan a disposiziun en il sistem d'infurmaziun d'archiv da l'Archiv dal stadi. En tut ils rapports è disponibla la funcziun da tschertgar text. Ils rapports annuals èn funtaunas d'emprim rang davart l'istorgia grischuna. Per part cuntegnan gia ils emprims rapports temas che ans occupan er oz; autras tematicas èn estras per nus. Il rapport annual 1849 infurmescha per exempel davart la superaziun da l'unda da fugitivs suenter las revoltas tudestgas da l'onn da revoluziun 1848, ma er davart las lungas discussiuns en connex cun la fusiun da la scola chantunala evangelica cun la scola chantunala catolica.
Istorgia da «surengiu»
Da l'administraziun derivan var 15 700 fotografias ord l'aria ch'èn da nov disponiblas online. Ellas mussan il Grischun dals onns 1960 fin ils onns 2000 ord la perspectiva d'utschè. Ils sgols respectivs eran vegnids fatgs per incumbensa da la Mesiraziun chantunala. Quella duvrava las fotografias per mesirar parcellas, per far arrundaziuns dal terren, per eruir exactamain la «cuvrida dal terren» (guaud, terren cultivà, abitadi) e per actualisar ils plans da survista. Ils maletgs cuvran bunamain l'entir chantun, cun excepziun da singuls territoris autalpins nuncultivads e nunabitads.
Punctualmain per il giubileum: 100 onns AAS
La publicaziun la pli nova d'effectivs disponibels en furma digitala po vegnir interpretada er sco contribuziun da l'Archiv dal stadi dal Grischun al giubileum da 100 onns da l'Associaziun da las archivarias e dals archivaris svizzers (AAS) che ha lieu quest onn. Per quest motiv è arrivada quests dis ina «stgatla d'archiv viagianta» dal Tessin en il Grischun. Questa stgatla vegn emplenida cun spezialitads grischunas (documentaras) e tramessa vinavant en in'emna al chantun Glaruna.
Agiuntas:
Infurmaziuns:
Responsabladad: Uffizi da cultura