Zum Seiteninhalt

Retschertgas

Tschertga locala - en tudestg
(sin la pagina d'internet da l'archiv dal stadi inclusiv instruments da retschertga da PDF)

Sistem d'infurmaziun d'archiv

Ils instruments da retschertga per ils effectivs da l'archiv dal stadi dal Grischun stattan cumplainamain a disposiziun online. Il sistem da retschertga central è il sistem d'infurmaziun d'archiv. Novas registraziuns vegnan mo pli fatgas en il sistem d'infurmaziun d'archiv. Ils instruments da retschertga pli vegls sin palpiri èn per gronda part vegnids endatads da nov en quest sistem. Sch'ina nova endataziun na pareva betg dad esser raschunaivla, è l'instrument da retschertga respectiv vegnì digitalisà ed integrà en il sistem d'infurmaziun d'archiv sco "object digital da PDF". Il sistem d'infurmaziun d'archiv cuntegna pia en differentas furmas tut ils instruments da retschertga avant maun.

Instruments da retschertga

In ulteriur access a nossas archivalias porschan ils instruments da retschertga per ils effectivs che stattan a disposiziun sco PDF sin nossa pagina d'internet e che pon vegnir chargiads giu da là. Er en questa furma stattan a disposiziun online quasi tut las infurmaziuns d'index da nossas archivalias. Exceptads da quai èn in pèr effectivs che vegnan engrondids savens e permanentamain. En quests cas èn propi actualas mo las indicaziuns en il sistem d'infurmaziun d'archiv.
Fin l'onn 2012 èn ils instruments da retschertga er vegnids stampads. Ils instruments da retschertga sin palpiri ch'èn avant maun pon vegnir consultads vinavant en la sala da lectura da l'archiv dal stadi. Questa collecziun na vegn dentant betg cuntinuada.

Las archivalias sezzas n'èn per fitg gronda part betg accessiblas sur l'internet (online) e ston vegnir consultadas en la sala da lectura da l'archiv dal stadi. Emprims inventaris da fotografias èn però accessibels en moda digitala ed online en il sistem d'infurmaziun d'archiv. Ils documents da l'inventari da las "Landesschriften" stampadas, pia dals documents statals stampads, pon vegnir legids en moda digitala en il catalog da biblioteca.

Las cundiziuns per utilisar las archivalias chattais Vus sut il chapitel "Utilisaziun".

Retschertga en il portal da l'archiv

Dapi l'onn 2011 è l'archiv dal stadi dal Grischun affilià ad Archives online. En quest connex sa tracti d'in portal che permetta da retschertgar rauba da l'archiv en differents archivs svizzers. En Archives online vegnan rendidas accessiblas cun ina mascra da retschertga las metadatas ed ils documents che derivan da las bancas da datas dals archivs ch'èn affiliads e ch'èn accessibels al public. Il spezial vi da Archives online è che las utilisadras ed ils utilisaders pon retschertgar cun ina suletta dumonda a medem temp en plirs archivs.

Retschertgas en la biblioteca da l'archiv dal stadi

La biblioteca da l'archiv dal stadi dal Grischun sustegna la lavur cun las archivalias. I sa tracta d'ina da las bibliotecas las pli cumplessivas per l'istorgia dal Grischun. Savens chattan ins gia en la litteratura qua avant maun respostas a dumondas da gener istoric. Ultra da litteratura istorica èn disponibels er ils stampats uffizials chantunals.
L'inventari da la biblioteca da l'archiv dal stadi è integrà er en il catalog da l'uniun da bibliotecas dal Grischun. La tschertga en il catalog mussa resultats da tut las bibliotecas affiliadas. Ina retschertga exclusivamain en l'inventari da la biblioteca da l'archiv dal stadi è pussaivla sur la "tschertga extendida".

La biblioteca da l'archiv dal stadi è ina biblioteca da preschientscha; las medias disponiblas pon vegnir consultadas mo en la sala da lectura, i n'è betg pussaivel d'emprestar quellas.