Zum Seiteninhalt

Surpigliada

Differents centers da cumpetenza

L'istorgia e la cultura dal chantun Grischun vegnan documentadas en differenta moda e maniera. Perquai èn differentas instituziuns (museums, archivs, bibliotecas) sa spezialisadas sin l'archivaziun, sin la cataloghisaziun e sin la segirada da bains culturals.

L'archiv dal stadi è primarmain il lieu, nua che las scrittiras che vegnan producidas da l'administraziun chantunala, vegnan tegnidas en salv.

L'archiv da la citad da Cuira da sia vart metta en salv, conserva e fa accessibel scrittiras ch'èn impurtantas per l'administraziun da la citad e per sias partiziuns sco er ulteriur material da basa istoric che stat er a disposiziun per la perscrutaziun scientifica e privata.

Entant che l'archiv dal stadi è en emprima lingia cumpetent per actas uffizialas e per funtaunas betg stampadas, rimna la biblioteca chantunala medias stampadas ed audiovisualas che han in connex cun il chantun Grischun. Ulteriuras infurmaziuns davart ils differents centers da cumpetenza chattais Vus en il document Centers da cumpetenza GR.

Surpigliada d'archivalias da l'administraziun chantunala

  L'archiv dal stadi archivescha actas da l'administraziun chantunala ch'èn degnas da vegnir archivadas. Per quest intent vegnan las actas valitadas e preparadas. Per dumondas davart la consegna a l'archiv dal stadi stain nus gugent a Vossa disposiziun sut 081 257 28 03 (intern 2803) u sut info@sag.gr.ch.  

Surpigliada d'archivalias da persunas privatas / organisaziuns

En furma da donaziuns e da deposits permanents u tras acquisiziun prenda l'archiv dal stadi en consegna singuls documents u entirs archivs e relaschs e metta quels a disposiziun per la perscrutaziun da l'istorgia dal chantun Grischun e da las culturas regiunalas.
Dumondas retschavain nus gugent sut 081 257 28 03 u sut info@sag.gr.ch.