Navigation

Inhaltsbereich

L'Archiv dal stadi dal Grischun edescha atgnas publicaziuns; en spezial en la retscha "Funtaunas e perscrutaziuns davart l'istorgia dal Grischun (FIG)". Dapi l'onn 1986 vegnan publitgadas en questa retscha contribuziuns scientificas davart l'istorgia dal Grischun. Ultra da la publicaziun da tractats serva la retscha er a l'ediziun critica da funtaunas main enconuschentas dal temp medieval, dal temp modern tempriv e da la moderna. La retscha vegn cuntinuada permanentamain. Ella cumpara a partir dal tom 38 en la chasa editura Schwabe. La retscha po vegnir consultada online sut www.e-periodica.ch.

En il Cudesch da documents grischun èn ils documents dals onns 390 fin 1400 che pertutgan il Grischun vegnids edids. Tut ils documents èn vegnids surpigliads pled per pled, sch'els menziunan in emettur u in retschavider grischun u sch'ils objects (bains immobigliars, edifizis), als quals ins sa referescha, èn situads en il chantun Grischun. En ina furma uschè concisa sco pussaivel (regestas) vegnan quests documents menziunads. Els cuntegnan perditgas, garants, lieus d'emissiun u sumegliantas chaussas. Il Cudesch da documents grischun cumpiglia tut en tut otg toms cun passa 5100 documents. Tut ils toms dal Cudesch da documents grischun stattan a disposiziun en il format da PDF per chargiar giu.

Durant ils onns precedents èn er vegnids publitgads meds da tschertga ("repertoris d'archiv") sco er ulteriuras ovras cun funtaunas davart l'istorgia archivarica, economica, ecclesiastica u sociala. La glista da las publicaziuns cuntegna tut las publicaziuns dals ultims decennis.

Las publicaziuns pon vegnir empustadas en librarias.
Ils toms FIG 1–37 vegnan tramess da la Vendita grischuna da cudeschs / chasa editura Desertina, sch'exemplars en anc avant maun.