Navigation

Inhaltsbereich

Dapi l'onn 2019 vegnan digitalisads e mess a disposiziun online permanentamain inventaris d'archiv analogs (q.v.d. inventaris sin palpiri u sumegliant) en l'Archiv dal stadi dal Grischun. L'Archiv dal stadi ha definì trais puncts centrals en sia strategia concernent la digitalisaziun: inventaris da fotografias, inventaris da plans e stampats uffizials. Qua vegnan preschentads ils inventaris da fotografias e da plans digitalisads actualmain disponibels, cun access direct als digitalisats en il sistem d'infurmaziun d'archiv (banca da datas da l’archiv).
Las indicaziuns davart stampats uffizials digitalisads èn disponibels qua.

StAGR FN IV 13 /18 SM 61
StAGR FN IV 13 /18 SM 61: Ils 21 d'avust 1909 ha il ballun ad aria chauda «Helvetia» cumenzà a San Murezzan ses viadi a Karlsbad en Boemia.

Collecziuns da fotografias

C 19 Uffizi d'agricultura e da geoinfurmaziun – partiziun Mesiraziun: fotografias ord l'aria e plans da survista
La mesiraziun uffiziala dal chantun Grischun dovra registraziuns fotograficas ord l'aria per diversas incumbensas da mesiraziun. Questas fotografias ord l'aria èn vegnidas fatgas per exempel per actualisar ils plans da survista dal chantun, per mesiraziuns parcellaras, per arrundaziuns dal terren u per renovaziuns dals catasters sco er per documentar la «cuvrida dal terren» (guaud, terren cultivà, territori abità). L'effectiv total cumpiglia passa 24 500 fotografias ord l'aria (negativs, dias e copias latiers). Ils circa 15 700 negativs e dias èn vegnids digitalisads. Bunamain per l'entir territori chantunal datti fotografias ord l'aria. Mo singuls lieus betg abitads e betg cultivads en la las zonas autalpinas n'èn betg documentads cumplettamain. Las fotografias èn vegnidas fatgas durant ils onns 1960 fin ils onns 2000. Singuls sgols èn però gia vegnids realisads ils onns 1950. Er avant maun en l'effectiv digital èn ils plans da survista da la mesiraziun uffiziala da la perioda da 1924 fin 2013.
Dimensiun: 15 713 fotografias e 728 plans

C32 Inspecturat forestal: collecziun da fotografias 1892–1980

Dapi in temp pli lung dat l'Uffizi da guaud e privels da la natira (pli baud: inspecturat forestal) gronda paisa sin l'atgna documentaziun fotografica. Quel na documentescha betg mo las lavurs forestalas en il chantun, mabain vegn er duvrà per intents da scolaziun, per publicaziuns e sco basa da planisaziun. Per consequenza sa chattan en quest inventari ina varietad da fotografias concernent il guaud: ecologia da plantas, selvicultura, plantaziun, transport, antischelader, incendis da guaud, lavinas, bovas, construcziun da punts, politica forestala e.u.v.
Dimensiun: 3708 fotografias

N1 Fotografia Feuerstein, Scuol: relasch fotografic 1900–1955

Dal relasch fotografic da la dinastia da fotograficas Feuerstein a Scuol èn sa mantegnidas cunzunt fotografias da lieus, da la natira, d'animals, da la cuntrada, da l'architectura e da chaussas sco er documentaziuns dal mintgadi en l'Engiadina. Ins po partir dal fatg che bleras fotografias da persunas èn vegnidas dismessas ils onns 1950, uschia che mo ina pitschna quantitad da talas fotografias sa chatta en l'inventari. L'ovra dals fotografs Feuerstein (Johann, Domenic, Jon e Mic) è excellenta. Ella preschenta ina perditga impressiunanta da la vita economica e socioculturala da l'Engiadina bassa. Tematisads vegnan cunzunt: turissem, hotellaria, gastronomia, mastergn, traffic, isanzas/cultura, svilup da l'abitadi e la vita da mintgadi en la val. Il Parc Naziunal era impurtant per ils fotografs. El è vegnì fundà l'onn 1909 e documentà cun numerusas fotografias da natira e d'animals en l'inventari.
Dimensiun: 12 633 fotografias

N2 Gross Gian Battista (1883-1961), Tschierv, fotograf amatur: inventari da fotografias 1899–1944

L'inventari da fotografias dal geometer e da fotografs amaturs cuntegna fotografias da la cuntrada, cunzunt da Tschierv, da l'entira Val Müstair e da l'Engiadina. Vitiers vegn ina collecziun voluminusa da fotografias da persunas: famiglia ed amis, purtrets d'umens, da dunnas e d'uffants sco er fotografias da gruppas. Vinavant documenteschan differentas fotografias la vita professiunala e da mintgadi en la Val Müstair.
Dimensiun: 2416 fotografias

N3 Foto Gross, St. Gallen: fotografias en alv e nair 1922–1971

La fatschenta spezialisada da fotografias Gross è vegnida fundada l'onn 1921 da Hans Gross (1889–1942) a Son Gagl. L'interpresa ha producì fotografias da sgol, d'architectura, d'industria, da purtrets, da reportaschas e da reclama. Ils maletgs da cuntradas cuvrivan geograficamain il territori da tut la Svizra Orientala. La fatschenta spezialisada da fotografias possedeva in'atgna chasa editura da cartas postalas ed il commerzi cun cartas postalas era in sectur da fatschenta essenzial da Foto Gross. L'inventari qua avant maun cumpiglia fotografias da cuntrada e da l'aria cun punct central Grischun dal nord e Grischun central: Val dal Rain da Cuira, Tumleastga/Mantogna, Valragn, Surses ed Alvra. Da la Surselva e dal Partenz datti mo singulas fotografias. L'Engiadina e las vals dal sid èn strusch represchentadas. L'inventari da la fatschenta spezialisada da fotografias è vegnida dividida tenor puntgs da vista geografics; er en auters archivs da la Svizra Orientala chattan ins inventaris parzials correspundents. L'inventari il pli cumplessiv vegn tegnì en salv en L'Archiv dal stadi Son Gagl.
Dimensiun: 2999 fotografias

N10 Hurler Richard (1879–1957), Tschiertschen und Wiesen, fotograf: inventari da fotografias 1915 – ca. 1950

L'inventari da fotografias cuntegna cunzunt fotografias da la cuntrada e vistas sin ils lieus da Tschiertschen, da Wiesen e d'Arosa, ma er da la Val d'Alvra, da Surses, d'Avras, da Schons e da Tavau. Ultra da quai èn avant maun singulas fotografias da l'Engiadina, da la Bregaglia, da la Surselva e da Cuira. Tranter quellas sa chattan intgins dals pli vegls uschenumnads autocroms (fotografias en colur) dal Grischun. Tar l'inventari tutgan ultra da quai purtrets e fotografias d'occurrenzas.
Dimensiun: 751 fotografias

N11 Caspar Johann Christian (1883–1952), Cuira, fotograf: inventari da fotografias 1930–1950

L'inventari da fotografias cuntegna d'ina vart fotografias da la cuntrada e vistas sin ils lieus, da l'autra vart vistas internas da baselgias, cunzunt dal Surses e da la Val d'Alvra.
Dimensiun: 122 fotografias

N12 Lienhard & Salzborn: cartas da cabinet ca. 1885 – ca. 1905

La collecziun da las «cartas da cabinet» (copias d'albumin tratgas si sin chartun) cumplettescha il grond inventari da fotografias FN IV Lienhard & Salzborn/Salzborn affari da fotografias, Cuira/San Murezzan 1889–1963. Las fotografias pon tematicamain vegnir attribuidas a la fotografia da cuntrada turistica. Las cartas da cabinet mussan attracziuns da la cuntrada ch'èn vegnidas fotografadas per lung da las rutas descrittas en la litteratura da viadi en il Grischun, al Lai Rivaun, a Bogn Ragaz, al Gottard, sin il pass dal Grimsel, en il Tessin ed en la Vuclina. Motivs èn vistas sin las valladas e sin ils lieus, edifizis marcants, chavorgias, pass alpins, glatschers e pizs.
Dimensiun: 166 fotografias

N18 Collecziun da fotografias dal 19. tschientaner: vistas sin ils lieus e fotografias da la cuntrada dal Grischun

La collecziun da fotografias dal relasch da Peter Metz (1913–2009) cuntegna fotografias da differentas regiuns dal Grischun (danor Partenz, Surselva e Mesolcina). Tgi che ha collecziunà las fotografias ed ha mess ensemen en questa furma, è nunenconuschent, ma i sa tracta en mintga cas d'ina da las emprimas collecziuns da fotografias davart il chantun Grischun.
Las fotografias mussan cuntradas e vistas da vitgs. Ils onns 1860 èn fotografs activs internaziunalmain viagiads tras il Grischun ed han fotografà cuntrada e lieus per lung da las rutas principalas turisticas. Ins dastga far quint che las bleras da las fotografias èn vegnidas fatgas durant tals viadis, quai vul dir tranter ca. ils onns 1860 e 1870. Almain ina part da las fotografias è probablamain dal fotograf franzos Jaques Joseph Athanase Clouzard (1820–1903).
Dimensiun: 158 fotografias

FN IV Lienhard & Salzborn: affari da fotografias Salzborn, Cuira/San Murezzan 1889–1963

L'inventari da fotografias Lienhard & Salzborn cumpiglia fotografias da cuntrada, da lieus, d'architectura e da chaussas, da documentaziuns d'eveniments u dal mund da lavur sco er fotografias da purtret. In grond dumber da las fotografias s'occupa dal turissem. Tematisadas èn vegnidas en questa situaziun cuntradas muntagnardas e da lais, alpinissem, glatschers, hotels e meds da transport sco er per exempel la charrotscha (da posta). L'affar da fotografia «Lienhard & Salzborn» è vegnì fundà l'onn 1889 da Gottlieb Lienhard da Suhr (AG) e dal viennais Rudolf Ludwig Salzborn.
Dimensiun: 2878 fotografias

FN XXV Good Oscar (1880–1950): inventari da fotografias 1882–1950

Oscar Good era dals onns 1911 fin 1945 inschigner da cultura dal chantun Grischun. El ha sviluppà novs tips unitars da tegias d'alp e da stallas dad alp. Good ha documentà sia lavur «en il champ» en moda fotografica e n'ha latiers betg tschiffà mo ils edifizis d'alp. Er vias champestras, punts, saivs e lais chattan ins sin las fotografias.
Dimensiun: 679 fotografias

FR XL Rydzewski Anton von (1836–1913): inventari da fotografias 1892–1910

Anton von Rydzewski è vegnì tschiffà cun 50 onns da la «fevra da muntogna»: el è ascendì il Mont Blanc ed ha alura cumenzà a far bleras primascensiuns en la Bregaglia. Suenter che revistas alpinas han dumandà fotografias per illustrar ils artitgels da Rydzewski, ha el cumenzà a fotografar ils onns 1890. Il fotograf amatur ha fotografà numerusas muntognas, ma er vitgs da la Bregaglia, lur abitantas ed abitants sco er scenas dal mintgadi. Er la dunna Alexandrine da Rydzewski era savens il motiv da sias fotografias.
Dimensiun: 141 fotografias

StAGR P01 15.15.08
StAGR P01 15.15.08: Rhein-Correction bei Haldenstein, plan da 1868/69.

Collecziun da plan

P 01 Collecziun Archiv dal stadi

En la collecziun principala da plans e da chartas da l'Archiv dal stadi cun 32 sutcategorias per plans e chartas dal Grischun sco er 14 categorias per plans che pertutgan territori betg grischun, èn vegnids cataloghisads per exempel: plans dal vitg e da cataster, chartas geograficas, chartas geologicas e chartas da privel, plans da curvas d'autezza, cartas da cunfin, plans da vias da colliaziun e chantunalas, lingias da viafier, punts da la via, correcziuns da flums, edifizis publics ed istorics sco er incendis dal vitg.
Dimensiun: ca. 3500 plans

Collecziuns

Medemamain disponiblas digitalmain èn trais grondas collecziuns da l'Archiv dal stadi:
Collecziun da nodas-chasa
Collecziun da vopnas
Collecziun da sigils