Ils sigils eran durant il temp medieval e durant il temp modern ina furma per autentifitgar documents (sumegliant a la suttascripziun moderna). In bul da sigil stampà en tschaira vegniva duvrà fin avant paucs decennis er per serrar las cuvertas da brevs. In sigil intact signifitgava che la communicaziun era genuina.

En l'Archiv dal stadi dal Grischun sa chatta la pli gronda collecziun da sigils dal chantun. Particularmain sa tracti da copias da sigils en gip ed en tschaira. Ins chatta dentant er intgins sigils originals. Mez dal 19avel tschientaner ha la Societad per la perscrutaziun da l'istorgia dal Grischun, ina percursura da la Societad istorica dal Grischun (SIG) d'ozendi, mess la basa per questa collecziun. Grazia a la SIG è questa collecziun arrivada l'onn 1872 en il Museum retic ch'era gist vegnì avert da nov. L'onn 2010 ha l'Archiv dal stadi surpiglià la collecziun, perquai ch'ella ha connexs tematics cun l'inventari dals documents da l'archiv. Grazia a numerusas donaziuns ha la collecziun survegnì ina dimensiun considerabla en il decurs dal temp. Oz cumpiglia ella passa 4500 sigils.

Online chattais Vus en noss sistem d'infurmaziun d'archiv ils sigils categorisads en differentas serias. Principalmain sa tracti da sigils grischuns. I dat però er sigils – originals u copias – che derivan d'auters chantuns e da l'exteriur. Ils sigils grischuns èn tuts vegnids digitalisads.

La collecziun da sigils grischuns è dividida en las suandantas categorias:

Sigils statals

 

Qua chattan ins ils sigils da las Trais Lias, dal chantun Grischun, da la citad da Cuira sco er sigils da las vischnancas e da las dretgiras dal temp tranter il 13avel ed il 20avel tschientaner.

 - Lia / Trais Lias

- Vischnancas / vischnancas giudizialas

- Dretgiras / dretgiras autas

- Citad da Cuira cun dretgira e corporaziuns

- Chantun Grischun

Sigils ecclesiatics

 

Qua chattan ins ils sigils da las instituziuns spiritualas da l'uvestgieu da Cuira (uvestg, chapitel catedral, vicariat general, uvestgs auxiliars, dretgira ecclesiastica, seminari da spirituals), da las baselgias, da las plaivs e claustras e d'intginas missiuns da chaputschins en il Grischun dal temp tranter il 12avel ed il 20avel tschientaner.

- Uvestgieu da Cuira

- Claustras / baselgias

- Plaivs

- Missiuns da chaputschins

- Baselgias chantunalas

Sigils da famiglias

 

Qua chattan ins ils sigils da bleras famiglias grischunas e d'intginas famiglias estras. Ils sigils èn ordinads alfabeticamain tenor il num da famiglia en la collecziun. Els derivan dal temp tranter il 13avel ed il 20avel tschientaner.

- Famiglias / persunas

Ulteriurs sigils

 

Qua chattan ins sigils d'associaziuns e da societads sco per exempel da las societads da minieras, da la Societad istorica antiquara dal Grischun u dal regiment d'infantaria von Salis, da bancas grischunas, da delegads tar las Trais Lias e da delegaziuns a la Dieta federala u en consulats esters.

- Corporaziuns
- Bancas
- Delegads / consulats

Que chattan tut la collecziun da sigils en PDF. Cunter ina taxa pudais Vus retrair tar l'Archiv dal stadi digitalisats prezius en qualitad da publicaziun ubain stampats dals singuls sigils (en colur u en alv e nair).