Dals 25 da november fin ils 10 da december 2022 metta il Grischun puspè in signal cunter la violenza a chasa. Il focus dals dis d'acziun da quest onn è sin il tema «femicidi». Il chantun po sustegnair finanzialmain organisaziuns che sa participeschan e che realiseschan in'occurrenza u in'acziun.
La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas e la dimensiun. Il sectur da la violenza a chasa cumpiglia tut las acziuns da violenza corporala, sexuala, psichica u economica, e quai entaifer la famiglia u la chasada ubain tranter conjugals anteriurs u actuals ubain tranter partenarias u partenaris anteriurs u actuals.
Sustegn e finanziaziun tras il chantun
Cun ils Dis d'acziun cunter violenza a chasa dals 25 da november fin ils 10 da december 2022 presta il chantun Grischun, ensemen cun differentas organisaziuns, ina contribuziun per prevegnir e per cumbatter la violenza a chasa. La campagna «16 dis cunter violenza envers dunnas» è coordinada sin plaun naziunal e cuntegna er ils «Orange Days». Il tema central da quest onn è il «femicidi». Il Post da coordinaziun Violenza a chasa dal chantun Grischun coordinescha ils dis d'acziun en il chantun e prepara in fegl d'infurmaziun cun il program da tut las occurrenzas ed acziuns annunziadas. Ultra da quai po il chantun sustegnair finanzialmain occurrenzas ed acziuns che han lieu durant ils dis d'acziun en il Grischun e che tractan il tema «violenza a chasa» en general sco er il tema central «femicidi».
Annunzias e dumondas correspundentas pon vegnir inoltradas fin ils 31 d'avust 2022. Ils formulars pon vegnir chargiads giu da la pagina d'internet dal post da coordinaziun.
Agiuntas:
formular d'annunzia per in'occurrenza
formular da dumonda per sustegn finanzial per organisar e per manar tras in'occurrenza u in'acziun
Infurmaziuns:
Sabina Altermatt, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Sabina.Altermatt@soa.gr.ch
Responsabladad: Uffizi dal servetsch social