La Regenza ha garantì ina contribuziun chantunala da 105 000 francs a l'uniun «OL WM 2023 Flims Laax» per il project digital «App da cursa d'orientaziun per ils World Orienteering Championships 2023». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. L'entir project è budgetà cun circa 300 000 francs.

Cun il project duai vegnir lantschada ina plattafurma digitala per tut las utilisadras ed ils utilisaders sco er per tut las gruppas en mira en il sectur da las cursas d'orientaziun. L'app da cursa d'orientaziun è vegnida sviluppada en connex cun ils campiunadis mundials da cursa d'orientaziun 2023 a Flem Laax (WOC2023). Ella cuntegna in servetsch da resultats, il program d'occurrenzas, infurmaziuns davart las atletas ed ils atlets, ina interfatscha da social media, recumandaziuns logisticas sco er infurmaziuns e novitads davart l'occurrenza. Concretamain vegnan publitgadas en l'app infurmaziuns specificas per las differentas concurrenzas dals WOC2023, sco in livestream, resultats en directa, in livetracking da GPS, purtrets da las atletas e dals atlets sco er maletgs da webcams da la regiun. Cun agid dal profil d'utilisaziun duai plinavant vegnir purschì in bigliet d'entrada digital per tscherts secturs da l'occurrenza.

Ultra da quai duai l'applicaziun star a disposiziun e vegnir administrada er suenter ils WOC2023 sco portal d'access per il sport da cursa d'orientaziun en Svizra. Per quest intent duai il project digital vegnir surdà suenter ils campiunadis mundials a la Federaziun svizra da cursa d'orientaziun (Swiss Orienteering). Per il final da la cuppa mundiala da cursa d'orientaziun 2022 a Tavau Claustra (1.fin 3 d'october 2022) è l'app gia vegnida lantschada. Suenter vegn ella sviluppada vinavant fin al campiunadi mundial.

Ulteriuras infurmaziuns: https://grdigital.digital/

 

© Remy Steinegger 

La Regenza ha approvà in project da la citad da Cuira per curreger la Plessur. Dals custs totals da var 4,5 milliuns francs surpiglian il chantun e la Confederaziun maximalmain var 2,5 milliuns francs tenor la cunvegna da program da la NGF (nova gulivaziun da finanzas) en il sectur «ovras da protecziun cunter l'aua». Il project da correcziun dal flum protegia er la via dal Scanvetg e la via da Meiersboden. Perquai paja il chantun supplementarmain ina contribuziun per la construcziun da vias da 202 500 francs.

La Plessur curra en in chanal fortifitgà tras la citad da Cuira, avant ch'ella sbucca en il Rain Alpin. Il letg dal chanal è exponì ad in'erosiun latenta. Per evitar che l'aua portia davent material da glera e da sablun, èn vegnidas installadas en il passà numerusas traversas da betun stabilisantas en il letg. Las rivas lateralas dal chanal èn fixadas cun mirs da betun, da crappa e da maulta. Quest sistem da rempars ha ademplì ses intent tecnic fin ussa. En il rom da las controllas regularas dals stabiliments èsi dentant sa mussà ch'ils rempars existents èn donnegiads en differents lieus. Perquai è la citad da Cuira sa decidida da far ils proxims onns ina sanaziun. Las mesiras duain vegnir realisadas tut tenor lur urgenza en tschintg etappas da project. Trais etappas èn gia vegnidas exequidas (communicaziuns a las medias davart l'etappa 1, l'etappa 2 e l'etappa 3). En il rom dal project actual per la correcziun dal flum vegnan reparadas duas traversas existentas donnegiadas. Quatter ulteriuras traversas vegnan remplazzadas tras rampas a blocs ch'èn surmuntablas per ils peschs. En cas da basegn vegnan ultra da quai reparads ils mirs da riva existents e munids cun sustegns locals.

 

 

La Regenza ha approvà il project d'exposiziun per la correcziun da la via d'Engiadina e per la sanaziun da la via cunter la canera a l'entrada dal vitg da San Murezzan en direcziun da Silvaplauna. La punt Spuondas dad oz era vegnida construida l'onn 1973. Ses stadi pretenda ussa ina sanaziun. Er n'ademplescha la punt betg pli las pretensiuns da segirezza en cas d'aua gronda. Per pudair garantir la segirezza en cas d'aua gronda sto la punt vegnir posiziunada pli ad aut. Cunquai che la punt è corrodada pervia dal sal ch'è entrà en la chascha chavorgia, pudess ella vegnir reparada mo cun gronda fadia. Perquai vegn la punt existenta remplazzada tras ina punt nova.

Il project cumpiglia in traject da via d'ina lunghezza totala da var 470 meters. Ultra dal remplazzament da la punt Spuondas vegn il traject schlargià al profil traversal regular. Quai na porta betg mo in augment da la segirezza en cas d'aua gronda, mabain er in'optimaziun dal trassé orizontal e vertical sco er da la pendenza traversala. Plinavant vegn renovada la surstructura da la via, e l'aua da plievgia e da naiv sco er l'aua da la spunda vegnan inducidas en l'En ordaifer la zona da protecziun da l'aua sutterrana. Per motivs da la protecziun cunter la canera e da la segirezza stradala vegn reducida la sveltezza maximala signalisada entaifer il perimeter dal project, sin ils differents trajects, dad 80 km/h a 60 km/h sco er da 60 km/h a 50 km/h. A medem temp vegn construida ina porta d'entrada sin l'autezza dal magasin dals pumpiers.