Sut la devisa «si da las sutgas – pront – via!» han las politicras grischunas ed ils politichers grischuns cumenzà oz a bun'ura cun moviment sportiv il segund di da la sessiun d'october 2022. Sin invit da la Gruppa parlamentara per sport e moviment, da l'Associaziun grischuna da sport (AGS), da l'Uffizi da sanadad sco er da graubündenSPORT èn ellas ed els sa preparads per il di da sessiun cun in program da resvegl saun. Il plaschair da far cuminaivlamain sport è stà en il center da quest program.

Seser ditg senza interrupziun è in factur da ristga per la sanadad. Per quest motiv han las commembras ed ils commembers da la Regenza e dal Cussegl grond dà oz a bun'ura in bun exempel sin la Quaderwiese. Durant l'alva da la damaun han ellas ed els absolvì in trenament multifar per sa preparar per in lung di da sesida.

Politicras e politichers en furma sa participeschan a la concurrenza da las fracziuns
Tut en tut 30 politicras e politichers èn sa radunads a las 6.40 sin la Quaderwiese. Cun instrucziuns dad Annik Kälin, victura da la medaglia da bronz en l'heptatlon als campiunadis europeics d'atletica leva 2022, han ellas ed els mobilisà lur corps anc stanchels.

A la fin ha gì lieu ina pitschna concurrenza da las fracziuns che dueva mussar, tge partidas che pon mobilisar las politicras ed ils politichers ch'èn «il meglier en furma». Sa participadas èn la fracziun da la PPS cun 8 «atletas ed atlets», la PLD cun 7, la PS cun 4, la PVL cun 3 e l'Allianza dal Center cun 8. L'Allianza dal Center ha terminà la staffetta dals teams sco emprima avant la PPS e la PLD. Gudagnà han tut las participantas ed ils participants, perquai ch'ellas ed els han fatg insatge dal bun per lur sanadad ed han cumenzà plain schlantsch il di da sessiun.

Infurmaziuns:

Hanspeter Brigger, coordinatur dal program Promoziun da la sanadad, Uffizi da sanadad, tel. +41 81 257 64 05 / +41 79 257 18 10, e‑mail Hanspeter.Brigger@san.gr.ch

Responsabladad: Uffizi da sanadad