Il 2024 festivescha il chantun Grischun il 500avel anniversari da la fusiun da las Trais Lias. Cun sigillar il Patg federal han las Trais Lias mess l'onn 1524 il crap da fundament per il chantun Grischun dad oz. La Regenza vul festivar quest giubileum en moda degna. Ils proxims mais vegn elavurà in concept detaglià per l'onn da giubileum. Las festivitads duain avair lieu durant l'entir onn 2024 en differents lieus dal chantun.
Gia dapi l'onn 2020 sustegna la Regenza il project da perscrutaziun e da publicaziun «Atlas davart l'istorgia dal Grischun 1524–2024». Quest atlas vegn actualmain elavurà sut l'egida da l'Institut per la perscrutaziun da la cultura grischuna (icg) en collavuraziun cun l'Archiv dal stadi dal Grischun. El è la contribuziun essenziala istoric-scientifica per il giubileum da 500 onns Republica da las Trais Lias.
Nominà la cumissiun directiva e la direcziun dal project
Plinavant duai il giubileum vegnir festivà cun ina retscha d'occurrenzas e d'activitads en l'entir chantun e gidar a rinforzar l'identitad e la conscienza istorica da la populaziun grischuna. Sut la direcziun dal Departament d'educaziun, cultura e protecziun da l'ambient è vegnida nominada ina cumissiun directiva. Da quella fan part represchentanzas da la Chanzlia chantunala, da l'Uffizi da vischnancas, da l'Uffizi per economia e turissem sco er da l'Uffizi da cultura. En ina procedura d'invit ha la cumissiun envidà differentas purschidras e purschiders potenzials d'inoltrar in'offerta per elavurar e realisar in concept detaglià. L'agiudicaziun per la direcziun dal project externa ha survegnì l'agentura da communicaziun «Vinavant SA». Previs èsi che l'istoricher dr. Christoph Luzi collavura en il team da realisaziun.
Per la realisaziun da las festivitads da giubileum 2024 ha la Regenza concedì in import maximal da dus milliuns francs ord la finanziaziun speziala da la lottaria naziunala.
Dapli infurmaziuns:
Infurmaziuns:
- Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 10.30 fin las 11.30), e‑mail Jondomenic.Parolini@ekud.gr.ch
- Reto Weiss, archivari dal stadi, tel. +41 81 257 28 01 (cuntanschibel da las 10.30 fin las 12.00), e‑mail Reto.Weiss@sag.gr.ch
Responsabladad: Departament d'educaziun, cultura e protecziun da l'ambient