Da nov duai l'Uffizi da sanadad esser responsabel per la procedura d'admissiun e per la surveglianza dals furniturs da prestaziuns a quint da l'assicuranza obligatorica per la tgira da malsauns (AOMal) en il chantun. La Regenza ha deliberà ina revisiun parziala correspundenta da la Lescha davart l'assicuranza da malsauns e la reducziun da las premias. Il Cussegl grond vegn a tractar questa fatschenta previsiblamain il zercladur.
La revisiun parziala da la Lescha davart l'assicuranza da malsauns e la reducziun da las premias è necessaria pervia da la midada da la Lescha federala davart l'assicuranza da malsauns (LAMal; CS 832.10) . Da nov èn numnadamain ils chantuns cumpetents per ina procedura d'admissiun formala dals furniturs da prestaziuns a quint da la AOMal sco er per la surveglianza dals furniturs da prestaziuns admess. Fin ussa èn quai ils assicuraders da malsauns.
La revisiun parziala da la Lescha davart l'assicuranza da malsauns e la reducziun da las premias (LARP; DG 542.100) che la Regenza ha deliberà, regla ultra da quai er la limitaziun dal dumber da las medias e dal medis activs en il sectur ambulant, quai observond las prescripziuns dal dretg federal. La missiva cuntegna ils princips tenor ils quals ils dumbers maximals per las medias ed ils medis activs en il sectur ambulant duain vegnir fixads.
Agiunta:
Missiva
Infurmaziuns:
President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 8.30 fin las 9.15 e da las 16.00 fin las 16.30), e-mail Peter.Peyer@djsg.gr.ch
Responsabladad: Regenza