L'onn 1923 han la Svizra ed il Liechtenstein suttascrit in contract da duana che ha collià il Principadi cun il spazi economic svizzer e manà il stadi pitschen or da l'isolaziun economica. Sco vischin direct ha er il chantun Grischun rinforzà la collavuraziun cun il Liechtenstein durant ils onns. L'emna proxima festiveschan las duas naziuns ed ils chantuns cunfinants lur via cuminaivla cun ina gronda festa tar la veglia punt dal Rain che collia Vaduz cun Sevelen.
Il contract da duana da l'onn 1923 simbolisava da quel temp ina sort assicuranza da vita per il Principadi da Liechtenstein. Tras la conclusiun dal contract ha la Svizra declerà il stadi pitschen sco territori entaifer l'agen territori da duana ed ha uschia pussibilità sia survivenza economica. Fin suenter l'Emprima Guerra mundiala aveva il Principadi stretgs lioms economics cun l'Austria-Ungaria. Per pudair exister vinavant sco stadi suveran è la tschertga d'in nov partenari economic stada l'unica soluziun pussaivla.
Dal partenari da contract economic a l'allià amicabel
Il martgà intern dal Liechtenstein è fitg limità, malgrà la gronda capacitad da cumpra da las passa 39 000 abitantas ed abitants. Grazia a differentas cunvegnas ha il Liechtenstein dentant survegnì ils ultims decennis access a divers spazis economics. Dapi la suttascripziun dal contract da duana cun la Svizra avant 100 onns è il Liechtenstein daventà in stadi cun ina gronda valurisaziun en spezial en il sectur industrial e finanzial. Var la mesadad da tut las persunas che lavuran en il Principadi èn dentant cunfinarias e cunfinaris. La gronda part da las forzas da lavur da l'exteriur, numnadamain passa 23 000 (var 55 pertschient), derivan da la Svizra. Var 1200 dad ellas penduleschan di per di dal chantun Grischun en il Liechtenstein.
Dapi ch'il Liechtenstein fa part dal spazi economic svizzer, èn er sa sviluppadas relaziuns diplomaticas excellentas. En lur politica exteriura s'engaschan omadus stadis en blers secturs per ils medems interess e per las medemas valurs. La Svizra ed il Liechtenstein coopereschan regularmain, per exempel en la ONU u en connex cun la Curt penala internaziunala. Er il chantun Grischun tgira contacts excellents cun il Principadi. Quai sa mussa tranter auter dapi decennis a maun da las visitas regularas da las regenzas da tuttas duas varts dal Rain.
Relaziun concilianta
Betg mo economicamain profitan ils dus partenaris da contract in da l'auter. Per motivs militars ha il Cussegl federal sa stentà suenter la Segunda Guerra mundiala per ina part dal territori da Liechtenstein. Uschia èsi reussì ch'il Ellhorn, ch'è situà al vest dal Fläscherberg directamain sper il Rain, è daventà territori svizzer. La midada dal cunfin ha contribuì al bun clima tranter la Svizra ed il Liechtenstein, e tras l'attribuziun d'in territori militar impurtant è la vischnanca da Fläsch daventada per intginas hectaras pli gronda.
Vaduz daventa quartier da festa
Sonda, ils 29 d'avrigl 2023, ha lieu ina festa populara per il giubileum da 100 onns «Contract da duana Svizra – Liechtenstein» tranter la veglia e la nova punt dal Rain che collian Vaduz cun Sevelen. A partir da las 11.00 arrivan las delegaziuns uffizialas da la Svizra e dal Principadi da Liechtenstein en moda festiva sur la nova punt dal Rain. La populaziun da las vischnancas cunfinantas è envidada da sa participar a l'act festiv ed a las festivitads. Ultra da differents stans cun offerentas ed offerents da la regiun da cunfin datti per las visitadras ed ils visitaders in program cultural e musical varià sco er differentas activitads per ils uffants e giuvenils.
Per las visitadras ed ils visitaders na stattan a disposiziun naginas plazzas da parcar. Perquai vegni recumandà da viagiar cun il traffic public. Ulteriuras infurmaziuns davart il contract da duana sco er davart las festivitads stattan a disposiziun sin la pagina d'internet www.zollvertrag.li.
Fotografias agiuntadas:
Foto 2, Foto 3, Foto 4, Foto 5. Ina da bleras visitas tranter vischins: La Regenza grischuna, manada dal president da la Regenza dr. Emanuel Huonder, l'onn 1964 tar il prinzi Franz Josef II. von und zu Liechtenstein, sia consorta princessa Georgina e la Regenza dal Principadi da Liechtenstein a Vaduz. (Archiv dal stadi dal Grischun, signatur I 3 L)
Agiuntas:
- Documents istorics da l'Archiv dal stadi dal Grischun davart il contract da duana tranter la Svizra ed il Liechtenstein
- Flyer da la festa transcunfinala
Infurmaziuns:
Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 14.00 fin las 16.00), e‑mail Martin.Buehler@dfg.gr.ch
Responsabladad: Chanzlia chantunala