En in mais, ils 2 da settember, cumenza la chatscha auta grischuna. A partir da mez avust pon las chatschadras ed ils chatschaders retrair la patenta da chatscha tar la surveglianza da chatscha sco er en il Museum da la natira dal Grischun a Cuira.

Gia oz spetgan las chatschadras ed ils chatschaders grischuns cun fevra la proxima stagiun da chatscha che cumenza quest onn la sonda, ils 2 da settember. Per che tut saja pront per quel di, vegnan gia prendidas emprimas mesiras. Munidas e munids cun perspectiv, passentan las chatschadras ed ils chatschaders gia ussa mintga minuta libra en il territori da chatscha. Instancablamain spievlan ellas ed els la selvaschina ed observan las disas da quella. A chasa vegnan preparads ils utensils da chatscha sco er las victualias e las bavrondas per als transportar en l'alloschi da chatscha, e regladas ulteriuras chaussas organisatoricas. Èn vegnidas pajadas las taglias e l'assicuranza da responsabladad obligatorica? Èn las armas da chatscha vegnidas reguladas persunalmain? È la cumprova obligatorica da la segirezza da culp che sto vegnir preschentada per retrair mintga tip da patenta, vegnida fatga cun success? Èn las novaziuns las pli impurtantas da las Prescripziuns da chatscha enconuschentas? E la finala: Cura e nua pon ins retrair la patenta da chatscha?

Vendita da la patenta a partir dals 15 d'avust
A partir da mardi, ils 15 d'avust, pon las chatschadras ed ils chatschaders retrair la patenta da chatscha per la chatscha auta, bassa e da capricorns 2023 tar la surveglianza da chatscha en ils districts da chatscha sco er en il Museum da la natira dal Grischun a Cuira (mintgamai da mardi fin sonda da las 10.00 fin las 17.00). La patenta vegn pajada senza daner contant cun cartas da debit sco MaestroCard e PostCard, cun cartas da credit sco MasterCard e VisaCard sco er cun TWINT. La pussaivladad da pajar la patenta cun daner contant exista vinavant en il Museum da la natira dal Grischun, dentant betg tar la surveglianza da chatscha.

Sin la pagina d'internet da l'Uffizi da chatscha e pestga ed en il Fegl uffizial dal chantun Grischun pon ins consultar ils lieus, las datas e las uras per cumprar la patenta.

Absolvì l'examen da qualificaziun en il chantun
La chatscha auta grischuna dura quest onn dals 2 fin e cun ils 10 da settember sco er dals 19 fin e cun ils 30 da settember. En il Grischun dastga ir a chatscha mo, tgi che ha reussì l'examen da qualificaziun per chatschadras e chatschaders en il chantun Grischun. Ils examens da chatscha d'auters chantuns u d'auters pajais na vegnan betg renconuschids. Ulteriuras infurmaziuns sco er las datas pertutgant las chatschas en il Grischun pon ins consultar tar l'Uffizi da chatscha e pestga.

Agiunta:

Plan d'emissiun patentas da chatscha

Infurmaziuns:

Marc Hosig, manader dals Servetschs centrals tar l'Uffizi da chatscha e pestga, tel. +41 81 257 30 90 (cuntanschibel da las 10.00 fin las 12.00), e‑mail Marc.Hosig@ajf.gr.ch

Responsabladad: Uffizi da chatscha e pestga