Navigation

Inhaltsbereich

Tras la revisiun da la Lescha federala da chatscha l'onn 1986 è vegnida introducida en il Grischun la planisaziun da la chatscha en furma d'in management dals animals selvadis. Ils concepts da chatscha elavurads per mintga spezia da selvaschina èn vegnids adattads cuntinuadamain e sviluppads vinavant ils ultims 30 onns sin basa da las enconuschientschas da la biologia da selvaschina las pli novas.

Il concept da dus pass è orientà spezialmain a la chatscha da tschiervs, da chavriels ed er da portgs selvadis. Cun la fina rait d'asils da selvaschina vegn dirigida durant la stad la repartiziun da la selvaschina entaifer il spazi da viver. En spezial la chatscha da tschiervs daventa uschia calculabla. Tras la regulaziun finala da la populaziun da tschiervs a la fin da l'atun po la quota mancanta d'animals feminins vegnir controllada sin plaun regiunal e vegnir prelevada en moda effizienta. Uschia vegnan er ils tschiervs ch'èn immigrads da territoris ordaifer il chantun e dal Parc Naziunal Svizzer, adattads al spazi da viver d'enviern disponibel. Quai è in punct central per prevegnir a donns da selvaschina en il guaud da protecziun. Perquai ch'ils donns da selvaschina en il guaud èn dentant gronds ed èn s'augmentads ils ultims onns en differentas regiuns dal chantun Grischun, ha il squitsch da chatscha stuì vegnir auzà fermamain en questas regiuns. Per meglierar la situaziun ha la Regenza definì differentas finamiras e mesiras en la strategia concernent il "Spazi da viver guaud-selvaschina 2021". Ultra da las mesiras forestalas e da chatscha èn vegnidas definidas er mesiras per reducir il disturbi dal spazi da viver dals animals selvadis. Durant l'enviern pon ins uschia impedir che la selvaschina sa concentrescha e sa trategna en ils guauds problematics e ch'ella consumescha blera energia e chaschuna pia anc dapli donns. Durant la stad èn spazis da viver cun paucs disturbis impurtants per ina distribuziun optimala dals animals er en la cuntrada senza guaud. Uschia vegnan er impedidas concentraziuns en guauds spess.

La chatscha grischuna correspunda oz ad auts princips da la biologia da selvaschina, da l'ecologia, da la protecziun dals animals, da l'etica e da la sociocultura. Er en l'avegnir sto ella dentant vegnir adattada a las cundiziuns generalas che sa midan permanentamain e vegnir sviluppada vinavant.
Communicaziuns actualas davart la chatscha e la selvaschina chattais Vus sut la rubrica "Tgi essan nus – Actualitads – Chatscha e selvaschina".