Annunzia
A la fanestra dal temp d'annunzia èsi pussaivel da s'annunziar per la chatscha da capricorns cun agid dal formular uffizial dals 4 fin ils 15 da mars 2024.
La chatscha da regulaziun sin chaura da capricorn vegn cuntinuada ed er las chatschadras ed ils chatschaders pon s'annunziar per questa chatscha. Las infurmaziuns ed ils formulars correspundents chattais Vus medemamain sin questa pagina.
Pretensiun minimala
Per l'emprima chatscha sin ina chaura da capricorn ed in capricorn sto la chatschadra u il chatschader avair retratg almain 5 giadas ina patenta da chatscha auta.
Per la segunda, terza, quarta u tschintgavla chatscha sto la chatschadra resp. il chatschader esser stà avant almain 10 onns per l'ultima giada a la chatscha da capricorns. Ultra da quai sto ella avair retratg almain 5 giadas ina patenta da chatscha auta durant il medem temp. Divergenzas da questa regla èn pussaivlas e vegnan publitgadas en il fegl uffizial resp. sin questa pagina d'internet.
Formulars d'annunzia
Publicaziun
Tabella "Publicaziun"
Formular d'annunzia
Colonias
Annunzia per la chatscha da regulaziun sin chauras-capricorn 2024
Formular d'annunzia per la chatscha da regulaziun sin chauras-capricorn 2024
Suenter l'annunzia
Attribuziun dals bucs tenor classa da vegliadetgna
a) classa giuvna A
bucs dad 1 fin 2 onns: chatschadras e chatschaders da 25-29 onns*
b) classa giuvna B
bucs dad 1 fin 3 onns: chatschadras e chatschaders da 30-44 onns*
c) classa giuvna C
bucs da 4 fin 5 onns: chatschadras e chatschaders da 45-54 onns*
d) classa mesauna e veglia
bucs da 6 fin 10 onns e pli vegls che 11 onns: chatschadras e chatschaders da 55 onns e pli vegls*
(*decisiva è l'annada da las chatschadras e dals chatschaders)
Chatschadras e chatschaders, als quals è gia vegnì attribuì in buc da la classa mesauna e veglia en ina chatscha anteriura, ston cumenzar a sajettar in buc da la classa giuvna A, sch'els van danovamain a chatscha da capricorns.
Infurmaziun
Las candidatas ed ils candidats vegnan infurmads l'entschatta da zercladur, sch'els pon participar a la chatscha da l'onn current. L'annunzia da chatschadras e chatschaders che n'èn betg vegnids tschernids cun trair la sort, resta valaivla. Ella vegn resguardada l'onn proxim puspè per trair la sort.
Curs introductiv
Il curs introductiv obligatoric per chatschadras e chatschaders ch'èn vegnids tschernids cun trair la sort, ha lieu mintgamai mez avust.
Datas da la chatscha da capricorns
La chatscha da capricorns ha lieu dal 1. d'october fin ils 15 da november. Ella dura per mintga chatschadra e chatschader maximalmain 20 dis. En singulas colonias vala in'admissiun en etappas dals 5 fin ils 31 d'october/15 da november.
Custs
Taxa da basa
Per participar èsi da pajar ina taxa da basa da fr. 200.00.
Taxas da prelevaziun
fr. 160.00 per la chaura e per bucs 1-3
fr. 400.00 per bucs 4-5
fr. 660.00 per bucs 6+
Ulteriuras infurmaziuns
Ils capricorns èn animals fitg precauts e timids. L'experientscha ha mussà che la chatscha pretenda bler da las chatschadras e dals chatschaders: els ston pudair sa mover a moda segira en ils culms, avair ina buna cundiziun, savair observar intensivamain ils animals ed avair ina bun'abilitad da sajettar. Tgi che vul avair success sto ademplir questas pretensiuns ed avair l'october temp avunda per ir a chatscha.
Ordinaziun chantunala davart ils capricorns (OCapr)