Introducziun

Vulais Vus acquistar Vossa patenta da chatscha sin via digitala? Alura essas Vus exact al dretg lieu! A partir dals 3 d'avust 2026 cumenza la vendita digitala uffiziala da las patentas da chatscha grischunas. Impurtant da savair: Patentas empustadas sin via digitala vegnan emessas ensemen cun la glista da prelevaziun mo en furma digitala sin Vossa app e valan sco documents uffizials.

Tgi che vul per entant mo empruvar ina giada questa nova purschida, po testar il process d'empustaziun digital tranter il 1. ed ils 31 da fanadur 2026. Questas empustaziuns da test na vegnan betg elavuradas vinavant davosvart ed i na vegn betg emess ina patenta da chatscha valaivla. Per pudair far il test, resguardai las infurmaziuns e las prescripziuns qua sutvart. A partir da l'avust vegn il formular da test remplazzà tras il formular d'empustaziun uffizial.

Patenta digitala mo cun glista da prelevaziun digitala

Gia l'atun 2025 è la glista da prelevaziun digitala vegnida introducida en l'app da chatscha da l'Uffizi da chatscha e pestga. Uschia pon las chatschadras ed ils chatschaders registrar lur prelevaziuns directamain en l'app da chatscha e transmetter las datas a la surveglianza da chatscha. Tgi che acquista en l'avegnir ina patenta digitala, survegn quella directamain en l'app. En cas d'ina controlla pon las chatschadras ed ils chatschaders mussar il telefonin. Ina patenta digitala po mo vegnir acquistada, sch'ins dovra la glista da prelevaziun digitala sco app da chatscha sin il telefonin.

A chatschadras e chatschaders che van cunzunt a chatscha en territoris senza colliaziun cun la rait, recumonda l'Uffizi da chatscha e pestga da duvrar vinavant la glista da prelevaziun sin palpiri. E da chatschadras e chatschaders che van a chatscha en territoris senza colliaziun cun la rait e che vulan laschar mussar lur prelevaziuns tras ina terza persuna, premetta l'uffizi ch'els dovrian obligatoricamain la statistica sin palpiri. Els ston perquai consultar in post da vendita.

• Ulteriuras infurmaziuns davart l'empustaziun da la patenta da chatscha digitala chattais Vus qua sutvart.
• Infurmaziuns davart l'administraziun digitala da la glista da prelevaziun.
• Las chatschadras ed ils chatschaders che vulan pli gugent retrair lur patenta da chatscha sin la via analoga sin palpiri, pon er vinavant far quai. La patenta da chatscha po vegnir pajada cun la carta da credit u via Twint. La patenta da chatscha po er vegnir retratga a Cuira cunter pajament en daner contant. Da nov n'ha la vendita a Cuira betg pli lieu en il Museum da la natira dal Grischun, mabain en l'edifizi administrativ chantunal «sinergia» (Ringstrasse 10, Cuira).
• Survista dals posts da vendita uffizials.

Tge patentas pudais Vus acquistar? E co?

Cun la vendita digitala da patentas vegnan purschids ils suandants servetschs online:

• Patenta da chatscha auta incl. annunzia per la chatscha speziala
• Patenta da chatscha bassa
• Patenta da chatscha da capricorns
• Patenta da chatscha speziala
• Dumonda da patentas d'onur chatscha auta/chatscha bassa
• Empustaziun d'in bon per ina patenta da chatscha auta/chatscha bassa

Patentas da giasts e patentas per la chatscha da guetta pon vegnir retratgas vinavant mo al lieu tar ils posts d'emissiun da patentas. La patenta per la chatscha da capricorns vegn dada liber en furma digitala pir suenter il curs d'introducziun e suenter l'inspecziun mez avust.

Tge premissas stuais Vus ademplir per la vendita digitala da patentas?

Avant che Vus cumenzais cun la cumpra da patenta da chatscha digitala, verifitgai che Vus ademplis resp. che Vus hajas prendì enconuschientscha da las suandantas premissas. Tut ils documents necessaris ston esser avant maun.

• Per empustar la patenta da chatscha digitala e per sa registrar sin la plattafurma online ePortal duvrais Vus in'atgna adressa dad e-mail e Voss numer da telefonin.
• Per pajar la patenta da chatscha digitala duvrais Vus ina pussaivladad da pajar digitala sco TWINT, carta da credit/debit, postfinance servetschs electronics (excl. persunas cun domicil fiscal principal a l'exteriur).
• Ils suandants documents stuais Vus chargiar si obligatoricamain cun il formular digital (actual ed en ina qualitad bain legibla):
  • Cumprova/s da la segirezza da culp
  • Attest d'assicuranza
  • Cudeschet da patentas (1. pagina cun fotografia)
• L'empustaziun da la patenta da chatscha digitala po vegnir fatga durant l'entira perioda / l'entir temp da chatscha. L'emissiun da la patenta vegn garantida, sch'ils documents èn corrects e sche l'empustaziun è vegnida inoltrada 3 lavurdis avant il cumenzament da la chatscha (chatscha auta fin ils 28 d'avust 2026; chatscha bassa fin ils 25 da settember 2026).

Tge custs resultan per la cumpra?

• Cumpilaziun dals custs

Co pudais Vus cumprar la patenta da chatscha digitala?

Ina patenta da chatscha digitala vegn cumprada sur la plattafurma online ePortal. Qua sutvart As declerain nus l'empustaziun pass per pass:

1. Sche Vus vulais acquistar ina patenta da chatscha digitala, selecziunai l'emprim la pagina d'internet eportal.gr.ch. Sin questa plattafurma online stattan a disposiziun ils servetschs digitals da l'administraziun chantunala dal Grischun.
2. Sin il ePortal stuais Vus As registrar per il eConto, sche Vus n'avais betg gia avert in tal. Quest conto d'utilisaziun As permetta d'utilisar ils servetschs sin il ePortal en moda segira e simpla. La registraziun vegn fatga sur l'autentificaziun da dus facturs. Per pudair far quai duvrais Vus in'atgna adressa dad e-mail e Voss numer da telefonin. Avais Vus difficultads cun la registraziun? Contactai noss support.
3. Suenter che Vus As essas registrada u registrà per in eConto, pudais Vus testar il fanadur il servetsch cun la funcziun «Empustar la patenta da chatscha da test digitala» u selecziunar – a partir da l'avust – sin il ePortal il servetsch «Empustar la patenta da chatscha digitala».
4. Empleni il formular online en moda vardaivla e cun Vossas atgnas indicaziuns. Impurtant: L'adressa dad e-mail ed il numer da telefon ston appartegnair a la possessura u al possessur da la patenta. Per impedir retardaments, guardai ch'ils documents che ston vegnir chargiads si, sajan avant maun en ina qualitad bain legibla. Per il formular da test pon vegnir chargiads si documents fictivs.
5. Terminai Vossa empustaziun cun il pajament digital. Tip: Controllai ordavant Vossas limitas da pajament. Sch'il pajament è reussì, vegnis Vus renviada u renvià a la pagina da conferma. Per inoltrar la dumonda per la patenta survegnis Vus plinavant in e-mail da conferma sco er ina survista da Vossa empustaziun.
6. Cura che la patenta digitala e la glista da prelevaziun vegnan emessas, survegnis Vus in e-mail sco er in SMS dal secretariat da l'Uffizi da chatscha e pestga cun las ulteriuras instrucziuns.

Tge capita suenter Vossa empustaziun?

• Vossa empustaziun vegn per regla elavurada entaifer in di da lavur. Sche Vus avais dumondas en connex cun Vossa empustaziun, contactai il secretariat da l'Uffizi da chatscha e pestga (tel. 081 257 38 92 / e-mail: info@ajf.gr.ch). Tar l‘emissiun da la patenta poi dar retards, sch'i dat in grond dumber da dumondas. Perquai As cussegliain nus d'empustar Vossa patenta da chatscha digitala uschè baud sco pussaivel.
• Suenter che Vus avais fatg Vossa empustaziun da la patenta, survegnis Vus immediatamain Vossa patenta e l'access a la glista da prelevaziun digitala en Vossa app. Cura che la patenta e la glista vegnan emessas, survegnis Vus per e-mail ed SMS ina communicaziun cun ulteriuras instrucziuns.
• Las plumbas ed il formular blau appartegnent vegnan tramess per posta suenter l'empustaziun digitala.

Nua survegn jau agid?

Sche Vus avais difficultads cun la registraziun sin la plattafurma online e-portal, survegnis Vus emprims agids sco er pussaivladads da contactar il support.

En cas da dumondas davart la patenta da chatscha digitala pudais Vus consultar las «Respostas a dumondas frequentas» u guardar il video explicativ. N'èn anc betg tut las dumondas scleridas? Alura As drizzai a l'Uffizi da chatscha e pestga:

Qua chattais Vus dumondas impurtantas e respostas

Pertge ma stoss jau registrar sin la plattafurma online ePortal cun mia adressa dad e-mail e cun mes numer da telefonin?

Per emetter la patenta resp. per acceder a l'app dovri in'adressa dad e-mail valaivla. Plinavant vegnis Vus infurmada u infurmà davart l'emissiun via SMS, per il cas ch'il e-mail cun questa infurmaziun duess finir en l'ordinatur da spam.

Poss jau midar da la patenta digitala resp. da la glista da prelevaziun digitala als documents sin palpiri?

Gea. Sch'ina chatschadra u in chatschader vul midar durant la durada da las patentas da chatscha da l'app a la statistica sin palpiri, è quai pussaivel suenter avair consultà in post d'emissiun da patentas. Ina midada vala mintgamai per tut las patentas da chatscha currentas. Percunter n'èsi betg pussaivel da midar da la statistica sin palpiri a la soluziun digitala da l'app.

Po ina patenta digitala er vegnir emessa a curta vista?

Per ina patenta che vegn emessa a curta vista recumandain nus da consultar al lieu in post da vendita da patentas uffizial (survista dals posts da vendita uffizials). L'emissiun da la patenta digitala vegn mintgamai garantida, sch'ils documents èn corrects e sche l'empustaziun è vegnida inoltrada 3 lavurdis avant il cumenzament da la chatscha (chatscha auta fin ils 28 d'avust 2026; chatscha bassa fin ils 25 da settember 2026).

Po la patenta vegnir empustada sur l'internet er sin palpiri?

Na. Patentas da pestga e da chatscha che vegnan empustadas sur l'internet vegnan emessas mo en moda digitala. Perquai ch'i na vegn betg pli purschida ina vendita da patentas en il museum da la natira, vegn la vendita e l'emissiun da las patentas cumplettamain dal UCP. L'exposiziun digitala reducescha la lavur administrativa e gida cunzunt ad evitar sbagls ed ad evitar ina meglra survista.

Tge stoss jau far suenter che jau hai emess la patenta?

Suenter l'exposiziun survegnis Vus in SMS ed in e-mail cun las ulteriuras instrucziuns. Observai quel ed As annunziai tar il UCP en cas da dumondas u d'intschertezzas.

Tge stoss jau sco chatschadra u chatschader savair davart la patenta digitala e davart l'app?

Tut quai ch'è impurtant da savair davart il diever da la patenta digitala e da l'app chattais Vus qua.

Qua chattais Vus videos explicativs davart l'empustaziun