Introducziun

L'app po vegnir duvrada sin basa facultativa sco remplazzament per la glista da prelevaziun e da nov er per la patenta digitala. La patenta po mo vegnir emessa sin via digitala, sche la glista da prelevaziun vegn er manada en moda digitala.

Per ulteriuras funcziunalitads en connex cun la chatscha grischuna stat a disposiziun l'app «JagdGR» che custa, da l'interpresa privata dpstudio.

Sin questa pagina chattais Vus ulteriuras infurmaziuns davart il diever da l'app e videos explicativs detagliads. Quels decleran, co che Vus pudais duvrar l'app per prender invista da Vossa patenta sco er la glista da prelevaziun digitala.

Tge è nov en l'app per l'onn da chatscha 2026

• En cumbinaziun cun la glista da prelevaziun vegn la patenta da chatscha purschida en furma digitala.
• Las Prescripziuns da chatscha èn disponiblas en l'app.
• L'app vegn er purschida en lingua taliana.
• En la glista da prelevaziun datti adattaziuns pli pitschnas per registrar meglier ils animals.

Tge premissas valan per utilisar la glista da prelevaziun digitala?

• Smartphone che funcziunescha (sistem operativ iOS 13 u pli aut/Android 5.1 u pli aut) cun avunda prestaziun d'arcunaziun e d'accu.
• Adressa dad e-mail valaivla cun la pussaivladad da retschaiver e da leger e-mails sin il smartphone.
• Chargiar giu ed installar l'app «GEODATA – Jagd» dal purschider Sesam SA cun la versiun 2.39.0 u pli auta.

A chatschadras e chatschaders che van principalmain a chatscha en territoris senza colliaziun cun la rait, vegni recumandà da duvrar vinavant la glista da prelevaziun sin palpiri. Las chatschadras ed ils chatschaders che vulan ir a chatscha en territoris senza colliaziun cun la rait e laschar mussar las prelevaziuns tras terzas persunas, ston perquai obligatoricamain duvrar la statistica sin palpiri. Durant la preschentaziun da l'animal na dastgan las coordinatas er betg esser opprimidas, per che la surveglianza da chatscha possia chattar la prelevaziun en il sistem.

Perquai che la patenta sco er la glista da prelevaziun digitala valan sco document uffizial e perquai ch'ellas ston esser disponiblas en cas d'ina prelevaziun resp. ston pudair vegnir mussadas en cas d'ina controlla tras la surveglianza da chatscha, recumandain nus a las utilisadras ed als utilisaders da la glista da prelevaziun digitala d'avair cun sai ina funtauna d'electricitad externa sco ina powerbank.

Co funcziuna l'annunzia per la patenta digitala e per la glista da prelevaziun digitala (app)?

• L'annunzia vegn fatga cun retrair la patenta da chatscha.
• Per las persunas che retiran ina patenta tar ils posts d'emissiun da patentas:
  • I stat a disposiziun in formular d'annunzia per la glista digitala da las patentas resp. da prelevaziun. Sche Vus savais gia ordavant, che Vus vulais As annunziar per la varianta digitala, pudais Vus er purtar cun Vus il formular d'annunzia emplenì en furma stampada per retrair la patenta.
  • Suenter che Vus avais retratg la patenta, survegnis Vus da l'applicaziun speziala da chatscha dal chantun Grischun «Geodata» in e-mail da registraziun cun las ulteriuras instrucziuns. Faschai l'annunzia uschè svelt sco pussaivel. Ulteriuras infurmaziuns chattais Vus sut: «Support».
  • Sche Vus na survegnis betg in e-mail da registraziun, controllai sco emprim Voss ordinatur da spam. Sch'il e-mail n'è betg arrivà, contactai immediatamain il secretariat da l'Uffizi da chatscha e pestga (tel. 081 257 38 92 / e-mail: info@ajf.gr.ch).
• Las persunas ch'empostan ina patenta sin via digitala, ston far l'administraziun digitala da la patenta e da la glista da prelevaziun.

Tge infurmaziuns impurtantas e tge fatgs impurtants valan?

• Endataziuns en la glista digitala da prelevaziun (app) pon vegnir fatgas pir a partir da l'emprim di da chatscha, da la chatscha respectiva (3 da settember 2026 per la chatscha auta). La patenta vegn mussada en l'app, suenter che l'Uffizi da chatscha e pestga (UCP) ha dà liber tala.
• L'app vala sco document uffizial e sto vegnir purtada cun sai e pudair vegnir mussada da tut temp durant la chatscha. I vegn recumandà d'avair cun sai ina funtauna d'electricitad externa sco ina powerbank.
• Ils animals sajettads ston vegnir inscrits immediatamain, tuttina sco en la glista da prelevaziun sin palpiri. Sche l'endataziun d'ina prelevaziun na funcziuna betg, sto quai vegnir annunzià immediatamain a la surveglianza da chatscha ch'è cumpetenta per il territori. Sch'ina prelevaziun n'è ni registrada en la glista da prelevaziun ni annunziada a la surveglianza da chatscha a chaschun d'ina controlla, maina quai ad ina denunzia.
• L'endataziun en la glista digitala da prelevaziun è mo valaivla, sche quella è registrada cumplettamain e tramessa. En territoris senza colliaziun cun l'internet vegn l'endataziun arcunada sin l'apparat. Uschespert ch'i dat ina colliaziun cun la rait, sto la chatschadra u il chatschader terminar e trametter immediatamain l'endataziun. Quai na capita betg automaticamain!
• Cura ch'ina endataziun è terminada e tramessa, na po la chatschadra u il chatschader betg pli elavurar quella. En cas d'endataziuns sbagliadas sto vegnir contactada la surveglianza da chatscha ch'è cumpetenta per il territori.
• L'utilisaziun da la glista digitala da prelevaziun na chaschuna betg ina controlla pli severa tras la surveglianza da chatscha. La chatschadra u il chatschader po decider sez, sche las coordinatas da prelevaziun vegnan transmessas immediatamain u pir suenter la fin da la chatscha. Sch'il lieu, nua che la selvaschina è vegnida sajettada vegn zuppà, n'ha l'Uffizi da chatscha e pestga (UCP) nagina invista dal lieu da prelevaziun. Pir suenter la fin da la chatscha vegnan las coordinatas da prelevaziun zuppadas transmessas al UCP.
• Sch'il lieu d'ina prelevaziun vegn transmess en moda zuppada e sche l'animal sajettà duai vegnir preschentà a la surveglianza da chatscha en stadi frestg per la controlla, ston las coordinatas vegnir dadas liber. Prelevaziuns da terzas persunas pon mo vegnir preschentadas, sch'ils animals sajettads èn registrads cumplettamain e tramess cun las coordinatas dadas liber.
• Cun l'utilisaziun da la glista da prelevaziun digitala sur l'app na sto la glista da prelevaziun betg pli vegnir inoltrada a la fin da la perioda da chatscha da la patenta correspundenta.
• Ord vista da l'Uffizi da chatscha e pestga (UCP) vegn mess a disposiziun cun l'introducziun da la statistica digitala da chatscha in instrument nov ch'è orientà als basegns da la clientella, e che procura a medem temp per ina liquidaziun da las datas pli segira ed effizienta entaifer il UCP.

Nua survegnis Vus agid?

Sut «Respostas a dumondas frequentas» resp. en ils videos explicativs vegnan respundidas dumondas ed intschertezzas. Sch'i dat vinavant intschertezzas u dumondas, As drizzai als suandants posts:

Sch'i dat problems cun la registraziun, cun chargiar giu l'app, cun s'annunziar u cun la patenta da chatscha digitala:

En cas da problems cun la registraziun da prelevaziuns:

 As drizzai immediatamain a la surveglianza da chatscha ch'è responsabla per Voss territori.

Qua chattais Vus respostas a dumondas frequentas

Co stoss jau proceder, sche jau na poss betg ma registrar?

Suandai las instrucziuns en il e-mail da registraziun. Sche Vus n'avais betg survegnì il e-mail da registraziun, controllai Voss ordinatur da spam. Sche Vus n'avais survegnì nagin e-mail da registraziun, contactai il secretariat da l'Uffizi da chatscha e pestga (tel. 081 257 38 92 / e-mail: info@ajf.gr.ch). Ina instrucziun detagliada cun il proceder, en cas che Vus avais survegnì il e-mail da registraziun, chattais Vus en ils videos explicativs qua sutvart.

Co stoss jau proceder, sche jau na poss betg m'annunziar durant la chatscha currenta?

Controllai, sche Voss num d'utilisaziun è correct. Il num d'utilisaziun è Vossa adressa dad e-mail, cun la quala Vus essas As annunziada u annunzià per la glista digitala da prelevaziun. Sche Vus avais emblidà Voss pled-clav, pudais Vus dumandar in nov pled-clav en l'app. Quel As vegn tramess sur in nov e-mail da registraziun.

Co stoss jau proceder, sche jau na poss betg registrar ina prelevaziun?

As annunziai immediatamain tar la surveglianza da chatscha ch'è responsabla en Voss territori. Sch'ina prelevaziun n'è ni endatada en la glista da prelevaziun ni annunziada a la surveglianza da chatscha, maina quai inevitablamain ad ina denunzia.

Co stoss jau proceder, sche jau hai pers mes smartphone u sche quel è defect?

En cas d'apparats mobils defects u la perdita da tals sto la surveglianza da chatscha vegnir infurmada immediatamain en chaussa. Avant la proxima acziun da chatscha sto vegnir organisà in apparat substitutiv u dumandada ina glista da prelevaziun sin palpiri tar in post d'emissiun da patentas.

Co stoss jau proceder, sche jau hai fatg in sbagl cun registrar ina prelevaziun u fatg la registraziun duas giadas?

As annunziai immediatamain tar la surveglianza da chatscha ch'è responsabla en Voss territori.

Tge capita, sch'ina prelevaziun n'è betg registrada en l'app e n'è er betg vegnida annunziada a la surveglianza da chatscha?

Sch'ina prelevaziun n'è betg vegnida registrada en l'app ed er betg vegnida annunziada avant a la surveglianza da chatscha, maina quai inevitablamain ad ina denunzia, sch'i dat ina controlla tras la surveglianza da chatscha (betg inscrit la prelevaziun en la glista da prelevaziun).

Poss jau midar da la glista da prelevaziun digitala a la statistica sin palpiri?

Gea, sch'ina chatschadra u in chatschader vul midar durant la durada da las patentas da chatscha da l'app a la statistica sin palpiri, è quai pussaivel suenter avair consultà in post d'emissiun da patentas. Ina midada vala mintgamai per tut las patentas da chatscha currentas. Percunter n'èsi betg pussaivel da midar da la statistica sin palpiri a la soluziun da l'app.

Tge stoss jau far, sche l'app na reagescha betg pli u na chargia betg pli u sch'il messadi «sbagl intern» cumpara?

Serrar l'app u eventualmain reaviar il telefonin ed avrir da nov l'app.

Co poss jau dar liber il lieu d'ina prelevaziun zuppada?

Avri la glista da l'eveniment, selecziunai la prelevaziun pertutgada e mussai ils detagls da la prelevaziun. Cliccai silsuenter sin «Dar liber la localisaziun».

Qua chattais Vus videos explicativs