En il Grischun duain ils process administrativs en l'avegnir vegnir pussibilitads pli savens en moda digitala. La Regenza ha deliberà la missiva per il relasch d'ina Lescha davart l'administraziun digitala per mauns dal Cussegl grond. La lescha stgaffescha las basas legalas per la digitalisaziun da process administrativs e per la correspundenza giuridica electronica en proceduras administrativas.
Da pudair liquidar fatschentas administrativas cun las autoritads en moda segira sin via electronica correspunda ad in grond basegn da la populaziun e da las interpresas. Quai era gia vegnì percurschì en la strategia dad e-government relaschada da la Regenza la stad 2018 per ils onns 2019 2023. Il project legislativ qua avant maun creescha las basas legalas ch'èn necessarias per digitalisar cumplessivamain l'administraziun.
Portal dad e-government per servetschs administrativs digitals
Servetschs administrativs digitals duain esser applitgabels per la populaziun e per las interpresas en moda simpla, segira e senza barrieras. Ina rolla impurtanta gioga en quest connex il portal dad e government, sur il qual pon vegnir utilisads servetschs electronics dal chantun en moda centrala e cun las medemas datas d'access sco er inoltrads documents online. La Lescha davart l'administraziun digitala regla l'organisaziun, il manaschi e l'utilisaziun da quest portal.
Sut tschertas premissas vegnan vischnancas, regiuns ed auters purtaders d'incumbensas publicas medemamain a pudair utilisar il portal dad e-government chantunal per porscher lur atgnas prestaziuns a la populaziun ed a las interpresas. Ils servetschs stattan dentant vinavant a disposiziun sin «via betg electronica».
Pussibilitaziun da la correspundenza giuridica electronica
En proceduras administrativas èsi oz savens necessari da suttascriver a maun inoltraziuns u disposiziuns. Ina communicaziun cumplettamain electronica cun las autoritads n'è pia betg pussaivla sin fundament da las basas legalas vertentas. La revisiun parziala planisada da la Lescha davart la giurisdicziun administrativa stgaffescha las basas, per che dumondas possian vegnir inoltradas sin via electronica en il futur en l'entira procedura administrativa e per che disposiziuns possian vegnir communitgadas. En quest connex duain vegnir garantidas – cunzunt cun duvrar sistems da transmissiun (p.ex. il portal chantunal dad e-government) – l'identitad d'utilisadras e d'utilisaders sco er l'integritad da documents, quai en la medema dimensiun sco tar l'inoltraziun per posta e la suttascripziun a maun duai uschia pudair vegnir remplazzada. Er ordaifer sistems da transmissiun duai l'inoltraziun electronica da dumondas (p.ex. sur formulars online) vegnir pussibilitada sut tschertas circumstanzas.
Il Cussegl grond vegn a tractar il project en la sessiun d'october 2023.
Agiunta:
Missiva
Infurmaziuns:
President da la Regenza Peter Peyer, schef dal Departament da giustia, segirezza e sanadad, tel. +41 79 629 00 85 (cuntanschibel da las 12.00 fin las 13.00), e‑mail Peter.Peyer@djsg.gr.ch
Responsabladad: Regenza