Dapi 10 onns porscha l'Autoritad per la protecziun d'uffants e da creschids (APUC) en l'entira Svizra sustegn a persunas ch'èn en situaziuns da vita difficilas. Uschia er en il Grischun. A chaschun d'ina dieta da furmaziun da las collavuraturas e dals collavuraturs da la APUC Grischun a Bravuogn han il president dal Cussegl naziunal Martin Candinas ed il president da la Regenza Peter Peyer suttastritgà l'impurtanza d'ina lavur uffiziala datiers da l'uman.

La APUC en il chantun Grischun lavura dapi l'onn 2013 en tschintg lieus regiunals. Ella ha tut en tut var 60 collavuraturas e collavuraturs, ch'èn cumpetentas e cumpetents per scleriments, per servetschs giuridics, per revisurats e per l'administraziun. Dapi l'entrada en vigur dal nov dretg da la protecziun d'uffants e da creschids èn passa 31 000 proceduras vegnidas elavuradas da maniera professiunala.

A chaschun d'ina occurrenza da perfecziunament da la APUC a Bravuogn han il president dal Cussegl naziunal Martin Candinas ed il president da la Regenza Peter Peyer accentuà l'impurtanza da la APUC per ils uffants e per las persunas creschidas ch'èn en situaziuns da vita difficilas. Plinavant han els undrà il grond engaschament da las collavuraturas e dals collavuraturs en il rom da lur lavur pretensiusa. En ses pled davant las collavuraturas ed ils collavuraturs ha Peter Peyer drizzà l'attenziun sin il sustegn individual da las persunas pertutgadas. «Igl è impurtant che l'inscunter tranter la APUC e las persunas pertutgadas ha lieu sin il medem nivel», ha el ditg. L'access a la APUC stoppia vegnir concepì da maniera uschè simpla sco pussaivel, gist per ils pli debels da la societad. La APUC haja acquistà sia reputaziun tras professiunalitad e tras proximitad a la glieud. Quai sajan stadas duas finamiras da la revisiun da la lescha da l'onn 2013.

Il president dal Cussegl naziunal Martin Candinas ha undrà l'engaschament da las collavuraturas e dals collavuraturs. «Vus essas adina en acziun, cura ch'i va per las valurs e las temas las pli existenzialas da la vita: l'autodeterminaziun e la famiglia. Mintga cas è in act da ballantscha. Vus avais l'incumbensa da proteger ils uffants ed ils creschids cunter abus, negligientscha ed explotaziun», ha ditg Candinas davant las collavuraturas ed ils collavuraturs.

Matthias Tscharner, il manader da la APUC Grischun, ha mess il focus da l'occurrenza da perfecziunament da la APUC a Bravuogn sin la stima: «Las collavuraturas ed ils collavuraturs da la APUC han in grond satgados da savida, ma er in ferm dies. Ins scuntra praticamain mo persunas en situaziuns criticas ed en fasas da vita difficilas. Quai influenzescha la lavur tar la APUC», ha el ditg.

L'occurrenza da perfecziunament è vegnida cumplettada tras referats d'input da Marc Lüchinger, cussegliader spezialisà tar la partiziun Management da smanatschas da la Polizia chantunala, sco er dal scriptur Philipp Gurt, ch'è stà pertutgà sco uffant da mesiras uffizialas.

Fotografias agiuntadas:

Da sanestra: President da la Regenza Peter Peyer, president dal Cussegl naziunal Martin Candinas, Regula Hunger (Generalsekretärin DJSG), Urs Werner (manader da la APUC filiala Partenz/Tavau), Regina Gasser (Aufsicht KESB), Giusep Defuns (manader da la APUC filiala Surselva), Dumeng Conti (manader da la APUC filiala Grischun dal Nord), Benjamin Boss (manader da la APUC filiala Grischun Central/Moesa), Daniel Erne (manader da la APUC filiala Engiadina/vals dal sid), Matthias Tscharner (manader da la APUC Grischun)

Foto 2

Infurmaziuns:

Matthias Tscharner, manader da la APUC Grischun, tel. +41 81 257 52 95 (cuntanschibel da las 13.30 fin las 15.00), e‑mail Matthias.Tscharner@kesb.gr.ch

Responsabladad: Departament da giustia, segirezza e sanadad

Intgins chavazzins davart la APUC Grischun:

• Collavuraturas e collavuraturs: 60
• Lieus: filiala Engiadina/vals dal sid a Samedan, filiala Grischun Central/Moesa a Tusaun, filiala Grischun dal Nord a Cuira, filiala Partenz/Tavau a Tavau Plaz, filiala Surselva a Glion
• Incumbensas: La APUC Grischun ha l'incumbensa da proteger cun mesiras adequatas persunas cun in basegn da protecziun e d'assistenza sco er d'organisar agid per questas persunas en il sectur persunal e finanzial/administrativ u en la correspundenza giuridica, sche la famiglia u purschidas da sustegn voluntaras na pon betg prestar quest agid en moda suffizienta.
• Dapli infurmaziuns: pagina d'internet da la APUC Grischun