Servetschs administrativs effizients independents dal temp e dal lieu per la populaziun e per l'economia grazia a la digitalisaziun: La Regenza vesa in potenzial particular en il chantun cun la pli gronda surfatscha e vul accelerar considerablamain la transfurmaziun digitala en l'administraziun chantunala. Ella ha deliberà ina strategia correspundenta e planisescha mesiras da realisaziun en la dimensiun da 35 milliuns francs ed in augment dal dumber da plazzas internas da 45,6 equivalents a temp cumplain. L'investiziun vegn proponida al Cussegl grond en il rom d'in credit d'impegn en la sessiun da december 2023.

La digitalisaziun avanza en tut ils secturs da la vita quotidiana. Er il chantun Grischun è dumandà da nizzegiar las schanzas da la digitalisaziun a favur da las abitantas e dals abitants sco er da las interpresas e da las vischnancas. La debatta dal Cussegl grond en la sessiun d'october 2022 davart l'incumbensa Hohl concernent l'acceleraziun da la transfurmaziun digitala en l'administraziun ha mussà, ch'er la politica pretenda in'acceleraziun. Cun la «Strategia Administraziun digitala chantun Grischun 2024–2028» che sa basa sin las experientschas e sin las basas dals ultims onns, ha la Regenza la finamira d'accelerar considerablamain las activitads en il sectur digital.

Niz spezial da la digitalisaziun en il pli grond chantun da la Svizra
«Uniun e diversitad dattan forza – er en il spazi digital» sa cloma la visiun da la strategia. Cun la realisaziun da la «Strategia Administraziun digitala chantun Grischun 2024–2028» duai vegnir concepida in'administraziun digitala ch'è moderna e preparada per il futur, che stgaffescha ina plivalur ed in niz considerabel per las gruppas en mira. En il chantun Grischun cun sias 150 vals e cun bleras regiuns perifericas cuntegna la digitalisaziun in potenzial particular. Servetschs publics ed infurmaziuns pon vegnir mess a disposiziun en l'avegnir en moda pli cumpletta en tut las parts dal chantun, numnadamain sch'els vegnan concepids pli independentamain dal temp e dal lieu. Servetschs pli effizients e transparenza en l'interacziun cun l'administraziun èn medemamain finamiras, sco process digitals simpels e facils d'utilisar.

Extensiun cuntinuanta da la purschida da prestaziuns digitalas
En il rom da la strategia duain esser etablids fin l'onn 2028 ils servetschs da basa necessaris, sco per exempel in e-portal chantunal, la plattafurma electronica da barat («chascha da brevs digitala») u la gestiun electronica da las fatschentas entaifer l'administraziun. La purschida da prestaziuns digitalas per las abitantas ed ils abitants sco er per las interpresas duai vegnir extendida ed optimada cuntinuadamain. Latiers tutga l'extensiun d'infurmaziuns e da process d'autoritads disponibels digitalmain, sco per exempel la procedura electronica per la permissiun da construcziun. Er temas sco intelligenza artifiziala, cybersegirezza ed identitad electronica fan part da la strategia.

Investiziun en il futur digital
Per che la strategia possia vegnir realisada cun success dovri la sensibilisaziun e la qualificaziun da las collavuraturas e dals collavuraturs en l'administraziun e l'expertisa da persunas spezialisadas supplementaras sco er la coordinaziun interdepartamentala. Per realisar las mesiras planisadas, èn necessarias tut en tut 45,6 plazzas ed investiziuns da 35 milliuns francs. Ina gronda part da las plazzas che ston vegnir stgaffidas da nov, duai vegnir domiciliada tar l'Uffizi d'informatica, che sustegna ils departaments ed ils posts da servetsch a realisar projects da digitalisaziun. Plinavant duai vegnir stgaffì tar il Departament da finanzas e vischnancas in Post da stab Administraziun digitala, ch'è cunzunt responsabel per la planisaziun e per la coordinaziun strategica da la transfurmaziun digitala sin plaun interdepartamental. La finala èn previsas tar ils departaments e tar la Chanzlia chantunala persunas responsablas per la digitalisaziun, ch'èn cumpetentas per la realisaziun en lur departaments e che gidan ils posts da servetsch a preparar ed a realisar projects.

Decisiun dal Cussegl Grond en la sessiun da december
Cun il sustegn finanzial e persunal planisà survegn la transfurmaziun digitala en l'administraziun chantunala ina gronda prioritad e la realisaziun vegn accelerada considerablamain. Il Cussegl grond vegn a tractar quest rapport e la dumonda per in credit d'impegn correspundent sco er per las plazzas che vegnan duvradas supplementarmain durant la sessiun da december 2023.

Aguinta:

Missiva

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 13.30 fin las 17.00), e‑mail Martin.Buehler@dfg.gr.ch

Responsabladad: Regenza