Ina nova purschida d'ina soluziun transitorica tras la Scola auta spezialisada dal Grischun facilitescha a fugitivas e fugitivs l'admissiun ad in studi da scola auta. La purschida prepara las participantas ed ils participants per in studi da bachelor a la SAS dal Grischun ed integrescha en il cas ideal in praticum en ina interpresa da la regiun. Las emprimas sis participantas e participants oriunds da la Tirchia e da l'Ucraina han cumenzà quest atun ils studis da bachelor computational and data science e turissem.
La purschida vegn sustegnida dal Post spezialisà per l'integraziun da l'Uffizi da migraziun e da dretg civil e vegn finanziada sur il fond «Projects per fugitivas e fugitivs en las scolas autas» da Perspectivas – Studis (Uniun da studentas e students en Svizra). Las fugitivas ed ils fugitivs cun domicil en il chantun Grischun che sa qualifitgeschan per in studi da scola auta, survegnan – grazia a la soluziun transitorica – l'access ad in studi da bachelor en la SAS dal Grischun. Tscherner pon els ils studis inschigneria da construcziun, computational and data science, information science, mobile robotics, photonics e turissem. Ultra dals moduls dal studi tschernì frequentan els in curs academic da tudestg u in modul da sustegn en matematica.
Las cumpetenzas acquistadas qualifitgeschan las participantas ed ils participants – sch'els reusseschan cun success – l'admissiun al studi regular. Previs è in dumber da participantas e participants d'annualmain tschintg fin diesch persunas.
Access al martgà da lavur per persunas dal sectur d'asil fitg qualifitgadas
Il project ha l'intenziun da meglierar considerablamain la qualificaziun per ina scolaziun e per ina lavur sin il martgà da lavur da persunas dal sectur d'asil fitg qualifitgadas cun il status da dimora N, F, B u S, quai tant sin plaun chantunal sco er sin plaun naziunal. Cunzunt dapi l'erupziun da la guerra en l'Ucraina èn las dumondas da fugitivas e fugitivs da pudair absolver in studi s'accumuladas en la SAS dal Grischun. La soluziun transitorica da la scola auta spezialisada è ina part dal Program chantunal d'integraziun per ils onns 2024 fin 2027 (PCI 3).
La purschida da la SAS dal Grischun vegn cofinanziada sur il fond «Projects per fugitivas e fugitivs en las scolas autas» da Perspectivas – Studis. Perspectivas – Studis è vegnì lantschà l'onn 2016 da l'Uniun da studentas e students en Svizra e s'engascha per dapli egualitad da las schanzas areguard l'admissiun a las scolas autas. Il fond «Projects per fugitivas e fugitivs en las scolas autas» vegn alimentà da las fundaziuns Volkart, Mercator, atDta, Ernst Göhner, Otto Erich Heynau e Corymbo. Da l'onn 2023 fin l'onn 2026 vegn la soluziun transitorica da la SAS dal Grischun sustegnida dal fond cun 60 000 francs, quai cun la finamira da francar il project instituziunalmain sur la perioda da finanziaziun or.
Ulteriuras infurmaziuns:
Infurmaziuns:
- Felix Birchler, Uffizi da migraziun e da dretg civil, manader dal Post spezialisà per l'integraziun, tel. +41 81 257 36 84 (cuntanschibel da las 8.30 fin las 12.00), e‑mail Felix.Birchler@afm.gr.ch
- Anne-Marie Jäger-Stevenson, Scola auta spezialisada dal Grischun, manadra da l'International Office, tel. +41 81 286 39 03 (cuntanschibla da las 9.00 fin las 11.30), e‑mail Anne-Marie.Jaeger@fhgr.ch
Responsabladad: Uffizi da migraziun e da dretg civil / Post spezialisà per l'integraziun