Perquai ch'il privel è anc adina grond resta la via dal Bernina vinavant serrada per il traffic. Per entant n'èsi betg pussaivel d'avrir la via durant tschertas uras. La proxima communicaziun vegn fatga glindesdi suentermezdi, ils 6 da november 2023
Las daratgadas chaschunan anc adina retards tar las lavurs da rumida e da segirezza. L'Uffizi da construcziun bassa dal Grischun (UCB) lavura cun tutta forza per pudair avrir uschè svelt sco pussaivel la via dal Bernina per il traffic.
Situaziun anc critica per passadi durant temps fixs
Il UCB sa stenta da pussibilitar uschè svelt sco pussaivel il passadi durant tscherts spazis da temp. Perquai ch'il privel è anc adina grond, n'èsi cun la situaziun actuala er betg pussaivel d'avrir la via durant singulas uras.
Dapi la crudada da blocca, ils 26 d'october, han pudì vegnir realisadas differentas mesiras per augmentar la segirezza. Il ultims dis èsi però sa mussà, ch'il territori pertutgà è fitg instabil: En la zona da la distatga sa sviluppan adina puspè novs lieus d'erosiun che ston vegnir segirads. Chaschunadas vegnan questas erosiuns principalmain tras la ferma plievgia sco er tras naiv e tras il terren ch'è per consequenza cregn. Perquai datti adina puspè novas sbuvadas (guardar video) che crodan fin giu sin la via. Quella è actualmain cuverta cun material crudà e glera, e quai sin in'autezza da plirs meters.
Rutas alternativas e situaziun sin las vias
Ina colliaziun alternativa tranter l'Engiadina ed il Puschlav è pussaivla sur il pass dal Malögia. Sch'il pass Forcola di Livigno n'è betg serrà pervia da las relaziuns da naiv, èsi er pussaivel da sviar via Bormio e Livigno. Il UCB recumonda urgentamain da controllar avant il viadi la situaziun sin las vias sut www.strassen.gr.ch.
La proxima communicaziun vegn fatga glindesdi suentermezdi, ils 6 da november 2023 a las 15.00.
Agiunta:
Communicaziun a las medias da mardi, ils 31 d'october 2023
Fotografia:
Adina puspè croda nov material sin la via dal Bernina.
Infurmaziuns:
Jan Kamm, chef dal district 3 Samedan, Uffizi da construcziun bassa dal Grischun, tel. +41 81 257 68 07, e‑mail Jan.Kamm@tba.gr.ch (cuntanschibel fin las 17.30)
Responsabladad: Uffizi da construcziun bassa