A partir da damaun mardi avra l'Uffizi da construcziun bassa dal Grischun la via dal Bernina mintgamai da las 07.00 fin las 09.00 sco er da las 16.00 fin las 18.00 per il traffic. Sur la fin d'emna èn las lavurs da segirar e da rumir avanzadas bain grazia a las cundiziuns d'aura sitgas.

Las lavurs da segirar e da rumir èn avanzadas bain sur la fin d'emna. L'Uffizi da construcziun bassa dal Grischun ha buna speranza da pudair terminar en il decurs dal glindesdi las mesiras per pudair avrir la via durant tschertas uras.

Ils spazis da temp fixads valan ad interim
Per motivs da segirezza po la via vegnir averta durant tschertas uras mo durant ch'igl è cler. Perquai è la via dal Bernina averta a partir da mardi mintgamai da las 07.00 fin las 09.00 sco er da las 16.00 fin las 18.00 per il traffic. Durant quest temp èsi pussaivel da charrar sin la via, quai mintgamai sin in vial e sut la surveglianza da persunas en plirs posts da controlla. Quests spazis da temp valan cun resalva fin a l'avertura cumpletta da la via. Il UCB recumonda urgentamain da controllar avant il viadi la situaziun sin las vias sut www.strassen.gr.ch. Persunas spezialisadas da l'Uffizi da construcziun bassa vegnan a giuditgar cuntinuadamain la situaziun da privel. Sche questa situaziun avess da chaschunar midadas, p.ex. pervia d'in pegiurament da la situaziun da l'aura, vegnan questas midadas publitgadas a curta vista sin www.strassen.gr.ch.

La proxima communicaziun vegn fatga gievgia, ils 9 da november 2023 a las 15.00.

Agiuntas:

Communicaziun a las medias da venderdi, ils 3 da november 2023

Fotografia:

Situaziun sin la via dal Bernina il glindesdi en damaun, ils 6 da november 2023.

Infurmaziuns:

Jan Kamm, schef dal district 3 Samedan, Uffizi da construcziun bassa dal Grischun, tel. +41 81 257 68 07, e‑mail Jan.Kamm@tba.gr.ch (cuntanschibel fin las 17.30)

Responsabladad: Uffizi da construcziun bassa