A partir dal 2024 pon las persunas cun dretg da votar da las vischnancas da Domat, Landquart, Lumnezia, Puntraschigna, Poschiavo e Val Stussavgia votar sin via electronica. A chaschun da sia sesida dad oz ha il Cussegl federal dà la permissiun fundamentala per far emprovas cun e voting en il chantun Grischun.
Il chantun Grischun cumenza cun il manaschi d'emprova dad e voting. Suenter ch'il manaschi d'emprova ha cumenzà cun success il zercladur da quest onn en ils chantuns Basilea-Citad, Son Gagl e Turgovia, è ussa er il chantun Grischun pront per la votaziun electronica. A partir dals 3 da mars 2024 pon persunas cun dretg da votar dar giu lur vusch per l'emprima giada en furma electronica, e quai en las tschintg vischnancas da pilot grischunas Domat, Lumnezia, Puntraschigna, Poschiavo e Val Stussavgia. Landquart sco sisavla vischnanca da pilot suonda per motivs organisatorics e da termin in pau pli tard, a partir da la votaziun dals 9 da zercladur 2024. Cun la votaziun electronica procura il chantun Grischun per ina pussaivladad da la participaziun politica ch'è orientada al futur e rinforza uschia la basa d'ina democrazia digitala segira ed attractiva.
Il Cussegl federal dat la permissiun fundamentala
Premissa per il manaschi d'emprova dad e voting è la permissiun fundamentala ch'il Cussegl federal ha concedì oz – a chaschun da sia sesida – al chantun Grischun. Utilisà vegn il sistem dad e voting da la Posta Svizra cun l'uschenumnada verifitgabladad cumpletta. La verifitgabladad permetta da constatar en moda segira mintga emprova da manipulaziun reussida. Il sistem ademplescha las autas pretensiuns da segirezza da la Confederaziun e vegn controllà regularmain tras expertas ed experts externs per incumbensa da la Chanzlia federala.
Pussaivel da s'annunziar a partir d'immediat
En in emprim pass pon las persunas cun dretg da votar da Domat, Landquart, Lumnezia, Puntraschigna, Poschiavo e Val Stussavgia far diever dal chanal digital, ch'è la terza pussaivladad da dar giu la vusch. A partir dal 2025 pon er ulteriuras vischnancas interessadas sa participar. Persunas cun dretg da votar che sa decidan per e voting, ston s'annunziar ina giada tar lur vischnanca, e quai il pli tard 8 emnas avant lur emprima votaziun electronica. A partir d'immediat èsi pussaivel da s'annunziar. Per la votaziun dals 3 da mars 2024 serra la fanestra d'annunzia per e-voting ils 7 da schaner 2024.
Avant la votaziun survegnan las persunas ch'èn s'annunziadas per il e voting lur attest da votar per la votaziun electronica ed in fegl d'infurmaziun. Cedels da votar e cedels electorals na dovri betg pli. Las explicaziuns tar ils projects da votaziun vegnan messas a disposiziun mo anc en furma electronica a las persunas che fan diever dal e voting. Sche las persunas ch'èn s'annunziadas per il e voting vulan far diever d'in dals ulteriurs chanals da votaziun (votaziun per correspundenza / votaziun a l'urna), pon ellas contactar lur vischnanca per quest intent. Tut las infurmaziuns davart l'annunzia ed en general davart e voting èn publitgadas sin la pagina d'internet www.gr.ch/e-voting.
Qua vai tar l'annunzia per e voting en las vischnancas da pilot:
Infurmaziuns:
Daniel Spadin, chancelier, Chanzlia chantunala, tel. +41 81 257 22 21 (cuntanschibel fin las 16.00), e‑mail Daniel.Spadin@staka.gr.ch
Responsabladad: Chanzlia chantunala