La Regenza ha deliberà per la consultaziun il sboz per ina revisiun parziala da la Lescha da taglia e da la Lescha davart il svilup economic. Cun l'adattaziun da la Lescha da taglia duain las vischnancas grischunas vegnir participadas commensuradamain a las eventualas entradas supplementaras ord la taglia minimala da la OECD. La Lescha davart il svilup economic duai vegnir cumplettada cun in nov instrument da promoziun, numnadamain cun ils credits da taglia rembursabels qualifitgads (QRTC). Cun agid da quels vegn segirada e rinforzada l'attractivitad da l'economia locala e la cumpetitivitad dal chantun Grischun.

Ils 18 da zercladur 2023 han il pievel ed ils chantuns acceptà ina midada da la Constituziun federala pertutgant l'introducziun da la taglia minimala da la OECD en Svizra. Uschia vegn segirada l'imposiziun minimala da taglia da 15 pertschient per gruppas d'interpresas cun ina svieuta da passa 750 milliuns Euros en furma d'ina taglia cumplementara federala.

Las revisiuns da las duas leschas gidan a realisar la taglia minimala da la OECD en Svizra. Legalmain èn ellas bain independentas ina da l'autra, pervia da lur stretga relaziun tematica vegnan ellas dentant tractadas en in project cuminaivel.

Revisiun parziala da la Lescha chantunala da taglia
Las entradas da la taglia cumplementara federala van per 75 pertschient a favur da quels chantuns, nua che las interpresas pertutgadas èn obligads da pajar taglia. Las entradas supplementaras che resultan da la realisaziun da la taglia minimala da la OECD èn differentas en mintga chantun. Per il Grischun pon ins spetgar mo entradas minimalas che n'èn actualmain betg calculablas.

Tenor la Constituziun federala ston ils chantuns participar las vischnancas commensuradamain a las entradas. La Regenza propona da divider las entradas en ina proporziun da 75 pertschient a favur dal chantun e da 25 pertschient a favur da las vischnancas. L'entira cumpart da las vischnancas vegn repartida sin las singulas vischnancas en proporziun da las taglias sin il gudogn da las persunas giuridicas, ch'il chantun ha incassà per las vischnancas. Las datas ch'èn necessarias per questa clav da repartiziun èn disponiblas. Plinavant po uschia vegnir observà il secret fiscal.

Revisiun parziala da la Lescha chantunala davart il svilup economic
L'armonisaziun da la concurrenza fiscala internaziunala per las grondas gruppas d'interpresas tras la taglia minimala da la OECD ha per consequenza, ch'i vegnan applitgads auters instruments da promoziun (betg fiscals) en la politica internaziunala da la plazza economica. Per segirar l'attractivitad dal Grischun sco plazza economica, èsi opportun da sviluppar vinavant la politica chantunala cun mesiras betg fiscalas.

Per quest intent propona la Regenza d'introducir credits da taglia rembursabels qualifitgads (QRTC). En il senn da las prescripziuns da model da la OECD èn ils QRTC in instrument per promover l'economia locala, ch'è acceptà sin plaun internaziunal. Els correspundan gia oz a la pratica internaziunala usitada e vegnan gia applitgads en auters pajais. Cun quest instrument duain vegnir rinforzadas las activitads giavischadas da l'economia publica e las activitads d'interpresa, che meritan da vegnir promovidas, ed i duain vegnir dads impuls d'investiziun. Uschia duain vegnir promovidas las mesiras d'interprendider che vegnan prendidas per augmentar la valurisaziun chantunala, per rinforzar la perscrutaziun, il svilup e l'innovaziun sco er mesiras en il sectur da la persistenza ecologica. Ils QRTC duain vegnir introducids sche pussaivel senza chaschunar custs supplementars.

Ils documents da consultaziun pon vegnir consultads ussa
La consultaziun dura dals 15 da schaner 2024 fin ils 14 d'avrigl 2024. Ils documents respectivs pon vegnir consultads sin la pagina d'internet dal chantun Grischun.

Infurmaziuns:

• Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 13.30 fin las 14.30), e‑mail Marcus.Caduff@dvs.gr.ch
• Cusseglier guvernativ Martin Bühler, schef dal Departament da finanzas e vischnancas, tel. +41 257 32 05 (cuntanschibel da las 13.30 fin las 15.00), e‑mail Martin.Buehler@dfg.gr.ch

Responsabladad: Regenza