La Regenza ha dà en consultaziun il sboz per ina revisiun parziala da la Constituziun chantunala e da la Lescha davart ils dretgs politics en il chantun Grischun. Qua tras duai vegnir introducida la vegliadetgna da votar 16.

Durant la sessiun da zercladur 2022 ha il Cussegl grond incumbensà la Regenza da stgaffir las basas giuridicas necessarias per conceder il dretg da votar ed il dretg d'eleger activ en chaussas chantunalas e communalas a las persunas domiciliadas en il chantun Grischun che han il dretg da burgais svizzer e che han cumplenì 16 onns.

Cun la proposta per la revisiun parziala da la Constituziun chantunala duai quai daventar pussaivel. A medem temp duai la proposta per la revisiun parziala da la Lescha davart ils dretgs politics en il chantun Grischun stgaffir la basa giuridica necessaria per conceder il dretg da votar ed il dretg d'eleger activ en chaussas chantunalas a las Svizras ed als Svizzers a l'exteriur che han cumplenì 16 onns. Sche las Svizras ed ils Svizzers a l'exteriur duain survegnir il dretg da votar e d'eleger en chaussas communalas, decidan las vischnancas vinavant sezzas.

Ils documents da consultaziun èn ussa disponibels
La consultaziun dura dals 8 da matg 2025 fin ils 6 d'avust 2025. Ils documents correspundents pon vegnir consultads sin la pagina d'internet dal chantun Grischun.

Infurmaziuns:

President da la Regenza Marcus Caduff, schef dal Departament d'economia publica e fatgs socials

Las dumondas vegnan coordinadas dad Nadja Cadonau, responsabla per la communicaziun dal Departament d'economia publica e fatgs socials, tel. +41 81 257 44 60, e‑mail Nadja.Cadonau@dvs.gr.ch

Responsabladad: Regenza