La Regenza ha concedì ina contribuziun chantunala da maximalmain var 1,7 milliuns francs per ils onns 2025 fin 2028 per realisar la protecziun da muntaneras cun chauns, respectivamain il program chantunal per promover chauns da protecziun da muntaneras. Ils custs totals vegnan stimads a tut en tut var 3,6 milliuns francs. La Confederaziun surpiglia var 1,9 milliuns francs da quels.

Cun la revisiun da la legislaziun federala da chatscha per il 1. da favrer 2025 è il sectur dals chauns da protecziun da muntaneras vegnì concepì cumplettamain da nov. Cun contribuziuns reducidas da 50 pertschient sustegna la Confederaziun mo pli la tegnida da chauns da protecziun da muntaneras renconuschids e la lavur cun tals. Per garantir vinavant la protecziun da muntaneras cun chauns sto il chantun ussa surpigliar incumbensas supplementaras. Per quest intent dovri a partir da quest onn ina nova finanziaziun chantunala. Correspundentamain abolescha la Regenza ses conclus da l'onn 2021 (communicaziun a las medias dals 12-05-2021), che fiss anc stà previs per ils onns 2025–2026. La promoziun dals chauns da protecziun da muntaneras e la finanziaziun respectiva vegnan puspè fixadas cun in program da 4 onns. Ils detagls vegnan descrits en il nov «Mussavia davart chauns da protecziun da muntaneras» dal chantun Grischun.

Mussavia davart chauns da protecziun da muntaneras

© AGRIDEA

La revisiun parziala da la Lescha da taglia, concludida dal Cussegl grond ils 10 da favrer 2025, vegn messa en vigur retroactivamain per il 1. da schaner 2025. Il termin da referendum è scadì ils 20 da matg 2025. Entaifer quest termin n'èn vegnids inoltrads nagins referendums. Cun la revisiun parziala vegnan las disposiziuns obligatoricas da la Lescha federala davart l'armonisaziun da la taglia directa dals chantuns e da las vischnancas, ch'èn gia en vigur, transferidas formalmain en la Lescha da taglia.