La Regenza ha prolungà l'incarica da prestaziun cun l'uniun Oase en connex cun il project da pilot «Housing First» (cf. communicaziun da la Regenza dals 2 da matg 2024) fin ils 31 da december 2027. Per la perioda dal 1. da schaner 2026 fin ils 31 da december 2027 èn vegnids fixads custs maximals da 390 000 francs.

Suenter ch'il project da pilot ha durà stgars 10 mais, ha la Regenza tratg in emprim facit: La purschida «Housing First» serra ina largia en il sistem d'agid per persunas ch'èn stadas durant blers onns senza suttetg e ch'èn pertutgadas da problems psichics e/u da malsognas da dependenza. La purschida actuala per otg persunas na cuvra dentant betg la dumonda per quest servetsch. En il rom da la prolungaziun da l'incarica da prestaziun ha la Regenza perquai fixà, ch'il project po cumpigliar a partir dal 1. da schaner 2026 spazi d'abitar per totalmain 12 participantas e participants.

La Regenza ha concedì ina contribuziun da maximalmain 155 000 francs or da la finanziaziun speziala Sport per renovar la halla da raiver Rätikon a Küblis ed ha uschia approvà la dumonda da l'uniun «CAS Secziun Partenz». L'uniun è ina secziun dal Club alpin svizzer (CAS) e maina tranter auter ina halla da raiver publica a Küblis. Questa halla sto vegnir sanada urgentamain. Senza sanaziun stuess la halla da raiver probablamain vegnir serrada la fin da l'onn 2025. Ils custs da sanaziun importan tut en tut 745 000 francs. Las lavurs da sanaziun cumenzan previsiblamain l'atun 2025, cura che la finanziaziun totala è segirada.

In'ulteriura contribuziun or da la finanziaziun speziala Sport ha la Regenza garantì a l'Uniun da glatsch Viamala per construir ina patinera da glatsch artifizial en la vischnanca da Seglias. Per quest project quintan ins cun custs totals da 915 000 francs. Da quels èn 550 000 francs imputabels per la calculaziun da las contribuziuns. Sin basa da quai sustegna il chantun il project cun maximalmain 110 000 francs. Actualmain exista là ina patinera da glatsch natiral. Il manaschi da tala è mo pussaivel grazia a blera lavur voluntara. Pervia da las temperaturas adina pli autas po la plazza da glatsch natiral vegnir preparada, en il cas optimal, mo pli per paucs dis per onn. En la vischnanca da Seglias n'èsi perquai betg pussaivel da planisar en moda fidada il sport sin glatsch.

La Regenza ha approvà las mesiras d'urgenza, ch'èn gia vegnidas realisadas per segirar la sbuvada da la spunda Traversa tranter Andeer e Sufers. Per quest project ha ella concedi contribuziuns tenor la Lescha chantunala davart il guaud e tenor la cunvegna da program da la NGF cun la Confederaziun en il sectur «Ovras da protecziun e basas davart ils privels». Als custs calculads cun 450 000 francs ha ella concedì ina contribuziun chantunala da maximalmain 180 000 francs e disponì ina contribuziun federala da maximalmain 157 500 francs.

A l'ost da la punt da la via naziunala Traversa è vegnida giu la fin d'avust 2023, pervia da daratgadas, ina sbuvada sin la via. Per proteger il traject da via periclità cunter ulteriurs eveniments da crudadas e cunter ulteriuras sbuvadas, han la surfatscha da la sbuvada ed ils secturs da distatga stuì vegnir stabilisads e segirads immediatamain cun agid da mesiras da construcziun. Cun quest project ha l'Uffizi da construcziun bassa pudì restabilir immediatamain l'effect da protecziun ch'era avant maun avant l'eveniment e garantir la funcziunalitad da las ovras da protecziun pertutgadas, per evitar ulteriurs donns directs e donns consecutivs previsibels.

La Regenza ha prendì enconuschientscha da la petiziun «Cunter reducziuns da la sveltezza a Tavau – Na a tempo 30!». La petiziun, ch'è vegnida suttascritta da tut en tut 1024 persunas, è vegnida inoltrada ils 20 da favrer 2025 al Departament d'infrastructura, energia e mobilitad. La petiziun sa drizza cunter la reducziun da la sveltezza planisada a Tavau e numna differents motivs per la refusa. Uschia argumenteschan las petiziunarias ed ils petiziunaris, che las mesiras previsas chaschunian malcuntentientscha tar la populaziun ed en il turissem. Ultra da quai teman ellas ed els, che las mesiras na cuntanschian betg la valur en mira e n'hajan pia nagin effect.

Enconuschientscha da la petiziun

Las elecziuns da renovaziun da la Regenza per la perioda d'uffizi dal 1. da schaner 2027 fin ils 31 da december 2030 han lieu dumengia, ils 14 da zercladur 2026. In eventual segund scrutini per las elecziuns da la Regenza è previs per dumengia, ils 16 d'avust 2026. Ils 14 da zercladur 2026 han er lieu las elecziuns dal Cussegl grond per la perioda d'uffizi da l'emprim di da la sessiun d'avust 2026 fin al cumenzament da la sessiun d'avust 2030.

La repartiziun dals sezs dal Cussegl grond sin ils circuls electorals vegn previsiblamain concludida e communitgada da la Regenza vers la fin da settember 2025, uschespert che las cifras da la populaziun svizra en ils circuls electorals, ch'èn decisivas per la repartiziun, èn avant maun sin basa da la statistica federala dal stadi annual da la populaziun (ESPOP).

La Regenza ha elegì Linda Schädler per il 1. da fanadur 2025 sco nova commembra da la fundaziun Collecziun grischuna d'art. Ella succeda a Walter Reinhart, che banduna la fundaziun la fin da zercladur 2025 pervia da la limitaziun vertenta dal temp d'uffizi. La Regenza engrazia ad el per ils servetschs prestads.

La fundaziun Collecziun grischuna d'art è l'organisaziun purtadra e la possessura da la collecziun d'art dal Museum d'art dal Grischun. Ella è vegnida fundada l'onn 1929 dal chantun Grischun, da l'Uniun grischuna d'art e da la citad da Cuira ed ha la finamira da mantegnair, da tgirar e d'intermediar l'art grischun en il Museum d'art dal Grischun.