Dapi il mars 2024 pon las votantas ed ils votants da 6 vischnancas da pilot en il Grischun votar sin via electronica. Il chantun Grischun po entant guardar enavos sin 6 votaziuns ed elecziuns reussidas cun e-voting. Fin la fin da l'onn 2025 vegn e-voting a star a disposiziun en var 20 vischnancas grischunas.

L'onn passà ha il chantun Grischun cumenzà il manaschi d'emprova dad e-voting cun las 6 vischnancas da pilot Domat, Landquart, Lumnezia, Puntraschigna, Poschiavo e Stussavgia. Las persunas ch'èn s'annunziadas per e-voting en questas vischnancas han duvrà stediamain il nov chanal da votaziun. A chaschun da l'ultima votaziun federala dal pievel dals 9 da favrer 2025 han passa 1100 persunas votà sin via electronica. Cun questa bilantscha intermediara positiva vegn e-voting extendì durant l'onn current sin var 20 vischnancas.

Extensiun pass per pass
A partir dals 28 da settember 2025 pon las votantas ed ils votants da las vischnancas dad Arosa, Grüsch, Maiavilla, Malans, Panaduz, Razén, Scharàns, Silvaplauna, Sumvitg, Tavau, Tumein, Tumleastga e Valragn utilisar l'emprima giada e-voting. Per pudair far quai ston las persunas interessadas s'annunziar ad ura per il chanal da votaziun electronic. Ellas pon far quai ubain sur la pagina d'internet dal chantun, ubain sur quella da la vischnanca. Per che l'annunzia possia vegnir resguardada per la proxima votaziun, sto ella vegnir inoltrada il pli tard 8 emnas avant il di da votaziun respectiv. Per la votaziun dal pievel dals 28 da settember 2025 serra la fanestra d'annunzia ils 3 d'avust 2025, resp. en la vischnanca da Tavau gia ils 31 da fanadur 2025.

In'ulteriura extensiun da la purschida dad e-voting en il chantun Grischun suonda a partir da la votaziun dal pievel dals 30 da november 2025. En differentas vischnancas vegnian gia fatgas preparaziuns en chaussa. L'avust communitgescha il chantun il proxim pass d'extensiun.

En tut las vischnancas che sa participeschan al e-voting, dumbra il chantun Grischun actualmain ca. 3000 votantas e votants ch'èn s'annunziads per questa via da votar. Las persunas cun dretg da votar en ina da las vischnancas participantas pon s'annunziar da tut temp sur la pagina d'internet dal chantun u da lur vischnanca.

Ulteriuras infurmaziuns davart il tema e-voting chattais Vus sut www.gr.ch/e-voting ed evoting-info.ch.

Qua vai tar l'annunzia per e-voting en il chantun Grischun: https://www.gr.ch/e-voting/anmelden

Agiunta:

Infurmaziuns:

Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 10.30 fin las 12.00), e‑mail Daniel.Spadin@staka.gr.ch

zResponsabladad: Chanzlia chantunala