A partir dals 3 da mars 2024 pon persunas cun dretg da votar dar giu lur vusch per l'emprima giada en furma electronica, e quai en las tschintg vischnancas da pilot grischunas Domat, Lumnezia, Puntraschigna, Poschiavo e Val Stussavgia. Landquart sco sisavla vischnanca da pilot suonda per motivs da termin ed organisatorics in pau pli tard a partir da la votaziun dals 9 da zercladur 2024. Per utilisar il chanal da votaziun electronic ston ins s'annunziar ina giada. Per pudair far l'annunzia per e voting stuais Vus avair il dretg da votar en ina da questas vischnancas. Annunzias èn pussaivlas mintga mument e vegnan resguardadas, sch'ellas entran il pli tard 8 emnas avant il di d'elecziun u da votaziun.

Las persunas cun dretg da votar ch'èn s'annunziadas per il e-voting, survegnan per posta mo anc l'attest da votar per la votaziun electronica. Cedels electorals e da votar na dovri betg, ils ulteriurs documents (explicaziuns tar ils projects da votaziun) vegnan mess a disposiziun mo pli en furma electronica. 

Sche Vus vulais far diever d'in dals ulteriurs chanals da votaziun (votaziun per correspundenza / votaziun a l'urna) suenter Vossa annunzia per il e-voting, pudais Vus per quest intent entrar en contact cun Vossa vischnanca.

Essas Vus anc intscherta u intschert? Sin la plattafurma da test per e-voting (evoting.ch) pudais Vus empruvar, co che la votaziun electronica funcziuna. Ulteriuras infurmaziun davart e-voting chattais Vus sin la plattafurma d'infurmaziun dals chantuns (evoting-info.ch).

En cas da dumondas u dad intschertezzas, resp. per annullar u disdir Vossa annunzia, As drizzai a Vossa vischnanca: Vischnancas - Contact (gr.ch)