La Cumissiun dal Cussegl grond per economia e taxas (CET) ha predeliberà la missiva da la Regenza tar la revisiun parziala da la Lescha chantunala da taglia per mauns dal Cussegl grond. Il project che prevesa da distgargiar fiscalmain las famiglias e las persunas spezialisadas resta en la cumissiun per gronda part dispitaivel, quai er suenter la discussiun.

Sut la direcziun dal president da la cumissiun Oliver Hohl ed en preschientscha dal cusseglier guvernativ Martin Bühler, schef dal Departament da finanzas e vischnancas, ha la CET predeliberà la missiva da la Regenza tar la revisiun parziala da la Lescha chantunala da taglia. Il project prevesa differentas mesiras per distgargiar famiglias e conjugals cun duas pajas sco er las persunas cun activitad da gudogn (cf. communicaziun da la Regenza).

Discussiuns cuntraversas
Questa revisiun da la Lescha da taglia è il segund pass per realisar l'incumbensa Hohl concernent distgargias fiscalas per famiglias e per persunas spezialisadas, ch'il Cussegl grond ha acceptà ils 13 da favrer 2023. Suenter la decisiun unanima d'entrar en materia ha la cumissiun discutà ils singuls puncts dal project per part en moda fitg cuntraversa e pudì eliminar las differenzas mo en singuls puncts. En la votaziun finala ha la maioritad da la cumissiun perquai sustegnì il project e recumonda al Cussegl grond d'acceptar quel, entant ch'ina minoritad da la cumissiun refusa la revisiun parziala. Il Cussegl grond vegn a tractar il project en la sessiun d'avust 2025.

Mesiras per distgargiar famiglias èn dispitaivlas
Per augmentar l'attractivitad dal chantun per famiglias e per conjugals cun duas pajas prevesa il project d'augmentar la deducziun dals custs per la tgira d'uffants tras terzas persunas, la deducziun per conjugals cun duas pajas sco er las deducziuns per uffants. Ils augments proponids tar la deducziun per la tgira d'uffants tras terzas persunas sco er tar la deducziun per conjugals cun duas pajas vegnan approvads unanimamain da la cumissiun. Ina minoritad da la cumissiun refusa dentant l'augment tar las differentas deducziuns per uffants, perquai che l'effect da quest augment na distgargia betg tut las famiglias da medema maniera. La maioritad da la cumissiun sustegna il project er en quest punct.

Nagin augment da l'import liber da taglia
Per distgargiar fiscalmain las persunas cun activitad da gudogn vul il project sbassar las taglias sin las entradas, quai cun auzar l'import liber da taglia tar la tariffa chantunala da la taglia sin las entradas. La maioritad da la cumissiun refusa questa mesira, perquai ch'ella na saja betg ina mesira sistematica e perquai ch'ella engrevgeschia a medem temp fermamain las vischnancas. Ina minoritad da la cumissiun vuless percunter auzar anc pli fitg l'import liber da taglia.

En moda cuntraversa ha la cumissiun la finala er discutà la dumonda, sch'i saja – sco consequenza da l'incumbensa Hohl – inditgà da sbassar ulteriuramain il pe da taglia. Questa dumonda vegn dentant a fatschentar il Cussegl grond pir en la sessiun da december 2025, cura che la deliberaziun dal preventiv 2026 ed uschia la fixaziun dals pes da taglia stattan sin il program.

Infurmaziuns:

Oliver Hohl, president da la Cumissiun per economia e taxas, tel. +41 79 651 51 78 (cuntanschibel a partir da las 09.00), e‑mail Oliver.Hohl@weberprevost.ch

Responsabladad: Cussegl grond / Cumissiun per economia e taxas